Awe diasabra marduga, a anuncia e resultadonan preliminar di eleccion Parlamentario 2017. AVP a resulta e partido ganado cu 23.385 voto, bon pa 9 asiento, sigui pa MEP cu 22.078 voto, bon pa 9 asiento, sigui pa POR cu 5531, bon pa 2 asiento y RED cu 4167 cu tabata suficiente pa 1 asiento. Tabatin 4 asiento, restzetel, den e eleccion aki, di cual MEP a haya 2, AVP 1 y POR tambe 1.
E ultimo Gobierno di coalicion tabata e mesun AVP na 1997. MEP a gana na 2001 cu 12 asiento y desde e tempo ey Aruba a conta cu Gabinetenan di sea AVP of MEP cu un mayoria absoluto. Ehempel den pasado di Aruba mes, pero awor aki di Hulanda, Corsou, Boneiro y Isla Riba ta suficiente pa sa cu Gobiernonan di coalicion no ta duradero.
Den e caso aki, por conclui cu e gran ganado ta RED, cu a subi di nada pa su 1 asiento solido. E otronan a gana den voto pero no den nan deseonan. AVP ta e partido mas grandi, pero cu a bay atras cu 4 asiento. E tabatin 12 asiento solido y 1 restzetel y awo e tin 8 asiento solido y 1 restzetel. Di otro banda MEP tabatin 6 asiento solido y 1 restzetel y awo tin 7 asiento solido y 2 restzetel. POR, cu ta deriva di PDR, tabatin 1 asiento caba y a keda cu e mesun asiento ey pero a logra 1 restzetel acerca. Depende con ta mira e resultado, si analisa e votonan di Otmar Oduber, Andin Bikker y Marisol Lopez na 2013, ta obvio, cu e resultado di awe marduga, cu algun di nan mester a bay basta atras.
Por conclui cu e resultado no ta duna pa hubilo na ningun banda. AVP a papia di 15 asiento y a haya 9. MEP a papia di mayoria y a pronostica 12 asiento y a haya 9. POR a papia di 5 asiento y a logra 2. Den tur caso pueblo a duna e partidonan menos asiento y menos voto di locual nan lo a desea. E grandinan a soña cu un mandato cla pa goberna nan so, pero boluntad di pueblo a resulta diferente.
Aunke cifranan exacto tin cu drenta ainda, ta parce cu e cantidad di no votadonan ta mas halto cu normal, mustrando un señal cla cu pueblo votado no tin tanto confiansa mas den politica. Ta algo cu tur partido mester traha riba dje awo.
