No obstante cu politicamente ta purba tur forma pa hunga cu cifra pa aparenta cu crimen no ta aumentando na Aruba, e realidad ta diferente. Practicamente tur dia polis ta confronta casonan di tiramento, conoci awendia como “drive-by shooting”. Mayoria di nan no ta yega na prensa, pero ta den e sistema di polis si. Como tal polis ta man na cabes cu tanto caso asina pa investiga y camntidad di sospechoso pa detene ainda, debi na e tendencia peligroso aki!
E foto aki ta di e hoben Joseph Jones di 18 aña, cu ta por lo menos un di e sospechosonan di tiramento. E ta biba den casnan di pueblo di Bushiri. Cu team di aresto den fin di siman a drenta dos cas na Bushiri. A detene tambe e hoben di fam Gross. No a logra haya Joseph Jones na cas, e tabata riba trip ainda ora cu Team di Aresto a drenta e cas y no a topa cu ne. E caso di tiramento aki ta den man di e team di recherche di Noord. Despues cu no a topa Jones na cas, mas cu un biaha polis a bay pa check si e t’ey pa asina deten’e. Despues di varios bishita, finalmente dialuna mainta a hay’e na cas y a deten’e.
Jaburibari vs Bushiri
E caso aki ta serio entre e grupo di Jaburibari y esun di Bushiri. Esun di Jaburibari a drenta Bushiri los tiro riba e homber di fam D. cu a keda herida na pia. Djey esun di Bushiri a drenta Jaburibari y aki tabata tin un tiroteo. Nan a tira riba otro. Den e grupo aki a detene entre otro e chauffeur di e auto cu tambe ta un hoben biba na Bushiri. E ta esun cu polis a detene na trabou na Shaba. Ta varios detencion tin caba. Mayoria di esunnan deteni awor aki ta den e gang di Bushiri. Probablemente lo yega e momento cu ta bay cuminsa detene tambe e miembronan di e gang di Jaburibari. Pa e relato completo, lesa e edicion di TREMPAN di awe.
