Ta entre 30 y 40 persona a perde nan trabao fo’i Sescobar Construction Cleaning & Gardening cu tin contract pa traha na aeropuerto, ta loke cu Mario Geerman, kende tabata traha p’e compania te ora cu su buchi a yena y hunto cu e trahadonan, a pone trabao abao.
Geerman ta sigui conta cu e problema ta varios cu ta basta grandi. E prome ta cu e contratista ta nenga di paga dia di fiesta. Dia di Himno y Bandera ainda nan no a pag’e. A avisa e trahadonan riba dje, cu e dianan cu ta bin di fiesta, nan no ta bay paga tampoco.
Esey ta un di e motibonan principal cu e trahadonan a pone trabao abao. A bisa e trahadonan tambe cu nan lo haya un contesta awe diaranson. Representante di Bohama a bisa nan cu no tin un solucion ainda. Si bay traha e fin di siman aki, lag’e pasa, no lo paga e trahadonan. Esey a haci cu nan a dicidi di sali afo.
Segun Geerman cu e contratista a bay asina leu riba un diasabra nan ta duna 1 florin extra pa ora pa nan traha. “Esey ta contra di tur etica di ley di Aruba. Nan no por haci e cos aki,” ta loke Geerman a remarca.
Otro cos ta e falta di respet cu e contratista tin. Geerman a bay puntra pa sa cuanto ora e tin traha p’e kinsena pa mira si tur cos a bay bon. Algun ora despues, e propietario a bin bis’e cu Geerman a perde su trabao p’e siguiente siman, djis pasobra el a bay puntra pa su orario di trabao. “E abusonan aki no por sigui existi,” ta loke el a remarca. Gobierno tin cu actua contra e hendenan aki, ta loke cu Geerman a menciona.
Geerman ta pidi minister Glenbert Croes, cu si e ta preocupa p’e trahadonan, pa pone pia dilanti y mustra cu e cos ki no ta bon. Kita KvK esunnan cu no ta cumpli cu ley di Aruba y pone nan riba caya mescos cu nan a haci cu e trahadonan. “Minister habri bo dos wowonan y mira e realidad rond di bo. Sali fo’i oficina un tiki,” ta loke cu Mario Geerman a menciona.
Carlos Rodriguez, kende ta un carpinte den servicio di e mesun compania, a remarca cu hopi di e trahadonan a traha aña pasa tambe y nan no a haya nan placa di vakantie. A para contract y habri un contract nobo, sin paga nan.
Pero fuera di esey, loke ta pasando ta cu e ta algo hopi straño pasobra e mes no a mira e tipo di cosnan aki ta pasa, loke ta sclavitud cu tin na pia di trabao, e decision cu nan ta tuma riba placa di e trahadonan y trahando den higr’i solo. Cu miedo e trahadonan ta bin tur dia pa nan cumpli cu nan trabao. “Kico bo kier pa nos haci?,” Rodriguez a cuestiona. El a traha cu hopi contratista y semper a haya su dianan di fiesta paga y ningun no a faya cu ne.
Pa mayor cobertura lesa TREMPAN.
