Un rato pasa, pa mas of menos 5:30pm, a spacha dos patruya di polis pa casnan di FCCA na Pos Chikito, pa un yiu cu a lanta cu famia. Na yegada di e defensornan di ley, a compronde cu un yiu homber a menasa su mesun mama cu morto.
Mesora polis na sitio a detene e homber y a pidi pa transport’e pa ward’i polis na San Nicolas pa por present’e dilanti un Fiscal Auxiliar cu mester dicidi riba su encarcelacion y/of persecucion penal.
Den e proceso pa hinca e sospechoso den e auto di transporte policial, el a expresa cu polis ta abusa di dje. Ey a splic’e cu su detencion no ta ningun abuso, sino ta procedura normal cu ta aplica contra yiunan cu ta menasa nan mesun mama cu morto. A splica e yiu homber cu ley no ta haci excepcion si bo menasa un straño of un famia, menasa di morto ta keda un hecho castigabel pa nos leynan penal, pa cual e mester mira un Sub Fiscal pa tuma un decision riba su caso.
