Diasabra atardi polis di Santa Cruz tabatin man yen pa atende cu un yiu homber bou influencia. Nan a bay na un cas den Seroe Biento p’e yiu cu tabata causa problema. El a agredi su mayornan door di pusha nan y por poco a benta nan abou.
Na yegada e mama y tata a conta e agentenan policial kico e yiu a haci cu nan. E yiu, kende ta bou di influencia di un substancia, a bandona e sitio despues cu el a lanta contra su mayornan. El a bay den un Mazda, cual auto no tin ningun documento. Despues cu el a bandona e sitio y di a agredi su mayornan, un otro informacion ta drenta cu el a presenta na Sabania Abou.
Aki tambe el a bin causa problema den e Mazda color blauw. Polis di Santa Cruz a bay Sabania Abou, pero na yegada a informa nan cu e homber a bandona e sitio caba. Un rato despues na altura di Santa Cruz 89, polisnan a bin topa cu e Mazda color blauw. Di biaha a para e chauffeur y atende cu ne.
E homber no por a mustra ningun documento legal cu e auto por ta riba caminda. Riba e auto no tin ningun papelnan di plachi number ni di seguro. Di biaha polis a confisca e auto, mientras cu e chauffeur bou di influencia a bisa di no ta contento loke nan a haci cu ne. Door di ta bou influencia y cu un auto sin documento, polisnan a bay cu ne warda, mientras ta pendiente pa mas investigacion y e homber a keda na pia.
