Aunke cu hopi hende ta sinti cu, ora un chauffeur drumi banda di caminda, ta un bon decision, toch autoridadnan ta mira e asunto diferente. Ley no ta permiti pa un persona drumi den auto banda di caminda, specialmente si e ta burachi. Esey a sosode diadomingo anochi pa mas of menos 10:00 pm den Caya Boes Orman, unda antes tabata Arendstraat.
Bisiñanan a yama pa pidi polis bin pa check un auto sospechoso para cerca di e casnan. Ora a patruya a yega na e sitio a topa cu un chauffeur drumi den auto. E homber a bisa polis cu el a sinti su curpa cansa y a dicidi di para e auto banda di caminda pa e drumi den forma di un power nap.
Asina mes polis a scucha e declaracion di e chauffeur, a deten’e na e sitio y transport’e pa warda di polis di Oranjestad pa present’e dilanti un fiscal auxiliar. Den casonan asina, hopi biaha, si un famia por pasa busc’e mesora y garantisa cu e ta keda cas, sa laga e sospechoso bay descansa na cas. Ta solamente ora nan ta patapata burachi sin sa nan nomber y adres y cu por spera mas problema cu ne den futuro, cu ta opta pa cer’e den un cel pa lag;e pasa su wayaba eyden.
