Empleadonan di Guarda nos Costa situa den Avenida Milio Croes, diadomingo pa 7:00 pm, a nota un auto sospechoso para pafo di e edificio di ex-Huis van Bewaring na Dakota.
Polis a bay atende cu e chauffeur, cu obviamente tabatin cara di ta masha “cansa” y mas bien a bay descansa su curpa net dilanti un centro di husticia. E homber a sigura polis cu e no ta haciendo nada malo y tampoco e tin ningun mal intencion door di staciona net dilanti Guarda nos Costa.
Pero polisnan no a confia e cuenta y a pidi e chauffeur pa baha for di auto pa haci un control. Durante e control a tuma nota cu e no tabatin ningun papel na ordo. Pues e auto ta den forma ilegal riba caminda, sin number paga, sin seguro y tampoco ta gekeur.
Polis a pidi pa un takelwagen presenta eynan pa hiba e auto marca Nissan modelo Sentra color blauw pa un ward’i polis, unda e ta keda den beslag te dia e doño presenta cu su belasting paga, number paga y un afspraak pa hiba e auto bay keur. Awor sigur e no por descansa mas, pasobra mester a hal’e te cas na pia!
