For di algo pasa di 8:30 pm a cuminsa drenta yamada na polis di algun establecimiento cu no ta atene nan mes na reglanan di Departamento di Salud Publico, por ehempel e distanciamento social. Asina a bishita dos bar, relaciona cu indicacion cu tin bailamento na grandi eyden y cu trahadonan no ta bisti tapaboca.
Polis a drenta e bar 809 situa den Wilhelminastraat. Ey berdad a constata cu tur hende tabata bailando cu otro, siendo cu bailamento ta prohibi den e reglanan di cual e establecimientonan mester atene nan mes na dje. Tambe e nota cu no tur hende eyden tabatin tapaboca bisti. Mas bien a nota cu e luga ta opera den forma di un bar y no un restaurant, manera e condicion ta awo. Es mas, paramento na bar pa pidi drinks ta prohibi for di inicio di e pandemia caba. Consecuentemente a dicidi pa cera e luga mesora.
Despues polis a sali pa Zona Zero, e bar situa net den banda di ward’i polis di Oranjestad. Ey tabata e mesun scenario, esta cliente para na bar ta pidi drinks, hendenan bailando riba pista, musica duro y no tur trahado bisti cu tapaboca. E miembronan di e Task Force di Crisis team, cu ta consisti di polis y otro departamentonan crucial di gobierno a dicidi di tuma accion mesora. Nan a ordena e doño pa cera e bar y saca tur hende pafo.
Den ambos caso lo manda informa fiscal di Ministerio Publico, pa verifica si ta bay duna un multa of no. Tene cuenta cu multanan pa falta di cumplimento na reglanan estableci di DVG relaciona cu medidanan di salud den e pandemia aki por ta bastante halto. A adverti establecimientonan di antemano, cu e permiso pa habri bek no ta pa bay bek na normalidad, sino pa atene nan mes na reglanan estricto di distanciamento social. Den caso cu no ta cumpli, tin chens cu ta dal e luga cera pa un temporada mas largo tambe.
Un di e rekisitonan ta, entre otro, cu mester tin un persona asigna pa controla y garantisa cu tur hende, trahado y clientenan, ta tene nan mes na reglanan di DVG. E persona mester keda check pa tur hende hunta man cu handsanitizer na entrada, pa controla nan temperatura di curpa, pa nan yena nan nomber y celular pa ora di contact tracing y pa eyden tur hende mantene distancia di por lo menos 1,5 meter for di otro. Ora cu musica ta asina bon y cu clientenan ta cuminsa baila, e persona mester paga e musica y sea taha e bailadonan of laga siguridad saca nan afo si nan no tin comprension pa e decision.
Ta e tipo di controlnan asina DVG ta spera di tur establecimiento comercial cu ta opta pa toch habri den e pandemia aki. Si no por cumpli, e ora e chens ta grandi cu lo prohibi nan di habri of nan ta daña pa tur otro cu si ta cumpliendo. Cu e cantidad di contagionan aumentando tur dia, awor ta momento pa hisa e nivel di control pa evita mas contagio. Y esaki ta den nos mesun man!
