Desde awe e por bisti su uniform bek cu e insigna di sub-inspector y desde e siguiente luna e por cobra su salario normal di sub-inspector tambe. Esaki despues cu awe Corte di Empleado Publico, a dun’e rason y a cuestiona con mando policial a investiga nan mesun colega, trapando riba ley y cometiendo un delito door di drenta un cas sin un investigacion penal y sin un permiso di hues comisario. Cu esey, gobierno lo tin cu paga e gastonan di corte y hues a destrui e decision di altocomisario Vanessa Tjon-Kock, cu ta casa di opositor politico, awe Minister di Husticia, Rocco Tjon.
Na luna di december ultimo funcionario policial y ex-politico Clarisca Velasquez a haya un sla cu un decision tuma contra dje. A dicidi di impone un castigo disciplinario p’e cu a afect’e enormemente. Tur esaki ta relaciona cu un incidente cu a tuma luga den temporada di pandemia. E tabata hunto cu su “ploeg” di polis den un cas di huur, cu segun mando policial, tabata mas bien un fiesta. Esaki ta un violacion di e medidanan impone. Y banda di dje, casi tur a meld ziek e siguiente dia. Mesora a cuminsa un investigacion.
Tabatin diferente caso unda cu a bisa cu loke a pasa no ta corecto. Dia 21 di december 2021, a inform’e cu ta bah’e di rango y consecuentemente a baha su salario. Algo cu ta un dobel castigo. Mesora el a dicidi di bay Corte contra e decision aki. El a haya e decision aki den su man dia 7 di januari 2022 y a entrega su obheccion prome cu 30 dia a pasa, pa cual por a trata su demanda.
E puntonan contra dje ta cu durante di pandemia a viola diferente regla; hunto cu coleganan a planea y a meld ziek di forma dudoso; a entrega un keho falso contra esunnan riba dje. Despues di e incidente na Merlot Villas, como un superior of funcionario di cargo halto, a expresa su mes di un forma no profesional contra esunnan mas halto cu ne; a expresa su mes di forma onbeschoft contra su superiornan y esunnan bou di dje.
E conclusion ta cu e no a comete plichtsverzuim manera mando policial ta bisa y hues a destrui e decision di december ultimo. Den e siguiente edicion di TREMPAN lo tin un relato mas amplio y detaya di e caso aki.
