Diasabra anochi a tuma luga den Centro di Bario Brazil, e show di e Reinanan Folklore Cultural 2022 como tambe e Acto di Coronacion di e reinanan.
Reina Folklore Cultural ta un actividad organisa pa Fundacion Chico Harms, den cuadro di e celebracion tradicional di Dia di Brazil. E reinanan cu lo guia e paradanan folklore cultural ta como lo siguiente:
– Baby Folklore- Cultural 2022: Lie-shenly Flanegin, representando su grupo: Fundacion PRO Cultura Arubano.
– Chikitin Folklore- Cultural 2022: Crisbel Alejandra Ayala Gutierrez, representando su grupo: GucciDancers Aruba.
– Prenda Folklore- Cultural 2022: Nealaney Tromp, representando su grupo: Grupo di Baile Dabaruida y Fundacion Rosea Cultural y su scol Colegio Laura Wernet Paskel.
– Damita Folklore- Cultural 2022: Analys Kock, representando su grupo: Grupo di Baile Dabaruida y Fundacion Rosea Cultural.
– Dama Folklore- Cultural 2022: Leedha Harms, representando Grupo di Antaño.
– Gran Dama Folklore- Cultural 2022: Jelisse Sharlyne Boekhoudt, representando: JenniVe Hi-Fashion Couture.
– Dama Grandi Folklore- Cultural 2022: Antonia Hilario, representando su grupo: Fundacion PRO Cultura Arubano.
– Pilar Cultural: Zenovia Wever.
BIBA NOS CULTURA
Fundacion Chico Harms, conhuntamente cu Centro Di Bario Brazil, comision Eleccion di Reina y Parada Folklore- Cultural Aruba ta gradici tur e reinanan di tur aña y ta desea e reinanan cu a resulta corona diasabra, hopi exito y bendicion; danki pa boso tremendo dedicacion y participacion. Cu e contribucion di un y tur, lo yuda na garantisa e exito y calidad di nos mesun cultura, folklore y tradicion cu tanto nos ta sostene y promove grandemente.
PARADA CULTURAL
Ken por a imagina cu 3 aña pasa e fundacion tabata coronando e Reinanan Folklore Cultural 2019 y despues di esaki bida a presenta cu e teribel pandemia cu a para tur cos, pero nunca e amor pa nos cultura y tradicion. Fundacion Chico Harms tabata tin un otro acto di coronacion di e reinanan Folklore Cultural y sigur tabata un actividad grandi, mirando e trabao y dedicacion di tur participante. E idea tras di e actividad aki, ta pa nos por tin e reinanan cu lo guia e tradicional Paradanan Folklore Cultural, relaciona cu Celebracion di Dia di Brazil.
Den nomber di Fundacion Chico Harms ta gradici tur reina corona for di un cuminsamento y e fundacion kier a resalta y elogia e trabao incansabel di tur grupo folklore-cultural.
Danki en special na tur grupo cultural y na tur e grupo- y directornan di baile, cosedo-, peinado-, makiyado y bailadonan pero tambe nan famia completo pa nan excelente trabao realisa cu tanto dedicacion.
Fundacion Chico Harms ta gradici tur persona cu a traha incansablemente pa asina aki por a garantisa un anochi sigur yena cu hopi creatividad y na unda a resalta tur aspecto di nos dushi folklore y tradicion manera ta nos trahenan cultural, nos bailenan, nos musica, nos arte y inspiracion. Fundacion Chico Harms ta para fuerte pa mantene na halto tur loke ta nos cultura y tradicion.Ayera nochi nos reinanan a presenta cu nan show oficial, na unda nan a resalta nan mensahe y tambe na unda nos musica local y tradicional a keda resalta.
Despues di e show cada candidata a haci nan desfile cu nan Trahe Cultural y na unda sigur Aruba completo por scucha e descripcion di cada trahe cultural y nan inspiracion cu diseñonan di antes y tambe di nos folklore.
Fundacion Chico Harms a gradici tur miembro di comision: Madelene Kelly, Marcia Dirks, Jacqueline Wever y Freddy Montoya representante di DCA y tambe tur boluntario pa nan valioso aporte y sosten brinda di semper. Hunto nos ta grandi y nos cultura lo sigui crece.
Fundacion Chico Harms ta spera Aruba completo pa bin masalmente pa presencia e dos paradanan na caminda, esta Parada cu Lanterna cu lo tuma luga diabierna dia 2 di september y e tradicional Parada Folklore Cultura cu ta tuma luga dia 4 di september 2022.
REINA 2019-2022
Por ultimo, e fundacion a gradici e Reinanan Folklore Cultural 2019-2022 pa na tres aña di reinado:
– Baby Cultural 2019: Lysanne Ras, representando: Grupo di Zenobia.
– Chikitin Cultural: Ivy Anne Bryson. Representando “Fundación Bernadina Growelll Kock.
– Damita Cultural: Eydilienne Nicolaas, Representando: Fundacion Bernadina Growell Kock.
– Prenda Cultural: Elizien Anterzin, Representando: Fundacion Bernadina Growell Kock.
– Dama Cultural: Genisha Angel. Representando: Fundacion Bernadina Growell Kock.
– Gran Dama Cultural: Jesselyne Winklaar Odor, Representando: FCCA Fundacion Cas Pa Comunidad Arubano.
– Dama Grandi Cultural: Ortencia Werleman, Representando: Grupo di Baile Dabaruida y Fundacion Rosea Cultural.
– Pilar Cultural Aruba 2019: Aura Maybelline Arends-Croes.
