Diabierna den oranan di atardi dos unidad policial a presenta cu urgencia na e crusada prome cu Korecie Institute Aruba (KIA) pa un pelea cu machete. E agentenan policial cu a yega na Juana Morto di biaha a bay intermedia den e discusion.
Nan a logra calma e tension pa por a scucha kico tur a pasa. Un di e personanan tabata bisa cu e otro persona a saca machete, mientras esaki a bisa di no a saca nada. Discusion a continua y un di e personanan a bay na su auto pa saca un machete.
El a coy e machete y tir’e abou, bisando cu esey t’e machete cu e tin. Mes ora un di e agentenan policial a confisca e machete. Despues di a intermedia hopi, polis a logra trankilisa ambos partido y no mester a detene niun hende.
