Diabierna corte a trata caso penal contra tres persona deteni durante un inval den Vilage (Sint Maartenstraat). Ta trata aki di e homber Didi Bop Richardson di 24 aña di edad, Sparky Chambers di 27 aña di edad y Jesus Brown di apenas 18 aña di edad.
E autoridadnan a haya tips cu tin bendemento di droga na un cas specifico y ora cu a bay vigila, a resulta cu esaki ta berdad. Ta trata di e personanan conoci pa husticia.
A interoga Jesus y despues a lag’e bay pasobra e ta menor di edad, pero poco despues a deten’e atrobe pa bendemento di droga. E acusado mas hoben ta biba cerca su wela, kende ta su voogd ya cu tanto e mama como e tata a fayece caba.
E autoridadnan a haya tip pero tambe e team di departamento di narcotica tabata mira movecion straño banda di e veld di basketball. A dicidi di tene un vigilancia durante tres dia, durante e tres dianan a capta tur movecion di bende di cos ilegal. E hendenan tabata bay na un cas den Sint Maartenstraat busca algo. Tabata trata di adicto. E momento ey e dos acusadonan Sparky y Didi Bop tabata biba ey.
Ora cu a acumula suficiente informacion a dicidi pa riba 25 di november tira un inval den e cas. Pero Chambers no tabata t’ey. A confisca 106 gram di cocaina y 365 gram di marihuana. A haya un suma di casi mil florin y 141 dollar.
Didi Bop a basha bou y mesora a confesa cu e placa ta di droga. Pa su mala suerte el a bay saca un potret y filma su mes cu un arma den su man y esey caba ta suficiente pa acus’e di posesion di arma di candela. Aunke cu e ta nenga, tin un testigo cu tabata den e auto unda supuestamente el a haya e arma, a bisa cu esaki ta pertenece na Richardson. Pero e acusado ta keda nenga.
A sigui y den un cas na Sero Colorado a detene Sparky Chambers cu su pareha di inicial V.B. A haya un etui den cual tabatin 1000 florin. E acusado aki tambe a basha bou cu durante Covid el a cuminsa bende droga pa mantene su mes y su yiu. Pues rond di 3 aña y no for di aña 2016 manera Ministerio Publico ta bisa.
Den e caso di e Jesus Brown, durante e vigilancia a mira cu e tabata bay na e cas den Sint Maartenstraat pa busca droga y bay bende esaki na e veld di basketball. A hay’e cu un suma chikito di placa y a confisc’e. A lag’e bay pasobra e tabata menor di edad. Ora cu a bay busc’e bek pa mas interogacion a gar’e ta entrega un sakito na un adicto. E biaha ey si el a keda den man di autoridadnan.
Didi Bop a admiti tur cos na e autoridadnan for di momento di su detencion pasobra e no kier alarga e situacion. Fiscal den su rekisitorio a haya e acusacion contra tur tres proba y tambe e posesion di arma di candela contra Richardson. El a demostra cu durante e inval, e hendenan a core bay den diferente direccion. A logra detene dos cu nan a observa ta bende droga.
A papia di e diferente testigonan cu a yega di cumpra contra e trio aki y den ki periodo. E acusadonan aki, na opinion di fiscal, ta probecha di miseria di e adictonan cu mester di e droga aki y ta aumenta e circulo di criminalidad. E adictonan no tin entrada y di un forma of otro mester yega na e placa, esta horta pa sacia nan adiccion.
Den caso di Brown e fiscal no por pidi otro cu castigo hubenil mirando e edad na momento cu el a comete e delito. A pidi 360 dia di cual 120 dia ta condicional, 2 aña di prueba y pa pone bou guia di Reclassering.
Pa Sparky, a dun’e beneficio di duda, pasobra e ta bisa cu no ta for di aña 2016 pero for di temporada di Covid. Pero a pone den e periodo di aña 2019 pa aña 2022. A haya droga den su poder tambe. A pidi 36 luna, kitando e tempo cu e ta deteni caba.
Pa Richardson, kende ta un cliente regular di KIA, a pidi 30 luna di cual 6 luna ta condicional, 2 aña di prueba y pone bou guia di Reclasering. A debolbe un auto confisca, placa ta keda confisca y droga destrui. Dia 7 di juli tin sentencia contra e trio.
