Diabierna durante tratamento di un caso penal contra e homber Dionicio Simeon Richardson di 24 aña a expresa su disgusto cu e no ta haya ayudo di e instancianan concerni. Banda di esaki, el a haya su mes ta lanta bos cu hues ora cu a lesa cierto parti di su declaracion cu segun Richardson ta e recherchenan a inclui esey.
A acusa e homber aki conoci como “Didi Bop” cu den e periodo di october pa november di aña 2022 el a bende droga, ta acus’e di posesion di droga, bende marihuana, ta acus’e di posesion di marihuana y di posesion di arma di candela.
E homber aki a conta cu el a busca trabou pero no a logra haya y pa e motibo ey el a dicidi di bende droga pasobra e mester di placa pa biba. E ta biba cerca su mama. E ta admiti e acusacion y a bisa “ta dos siman so mi a bende.”
Na su cas a haya poco cocaina y marihuana. El a bisa cu un parti ta pa uzo propio. Tambe a confisca un suma di placa. Loke cu a confisca for di camber di su mama, a bay bek pa e mama caba.
E arma ta pasobra den su celular a haya potret y video di dje cu un arma den su man. Segun el a bisa, el a haya e arma abou y a graba su mes cu ne y despues a tir’e abou bek. Dado momento durante tratamento e acusado aki a bira agresivo y papia di un forma sin respet pasobra loke cu hues a lesa cu e recherchenan a skirbi, el a bisa no ta berdad. A pesar cu el a firma esaki. “Mi a firma pa caba cu e cos aki”, Didi Bop a menciona.
Ademas, el a bisa cu no tin sentido pa e bisa cu e ta gana 1000 florin pa dia y cu ora cu e sali e lo sigui bende droga. E ultimo aki hues a bis’e: “Ta berdad un declaracion asina no tin sentido.” El a bisa hues bay wak su record y lo mira cu e recherche cu a interog’e ta un persona cu e tabatin problema cu ne algun aña atras ora cu e tabata den straatdienst. E polis a maltrat’e pisa y for di e tempo ey nan tin problema cu otro.
Su record cu husticia ta un lista largo. Pero den corte el a bisa cu e kier drecha su bida, e kier traha y forma un famia. Pero no ta haya ayudo. “E hendenan ta yuda esnan cu nan kier”, el a bisa refiriendo na e departamento di Reclassering.
Fiscal a lanta para y a puntra e acusado si di berdad y den serio e ta papia ora cu e ta bisa e kier drecha su bida. “Si di berdad, pero di berdad bo kier drecha bo bida, mi lo pidi nan yuda bo”, fiscal a bis’e. El a confirma cu e kier duna su bida un buelta pasobra e ta fada caba. “Mi ta cansa di KIA”, el a acusado a comenta. Fiscal den caso di Richardson a tene na cuenta cu e hoben aki apenas a caba di sali di KIA na october y e mesun luna a hay’e ta bende droga. A menciona testigo cu ta e personanan cu a cumpra droga cerca dje. A hay’e cu 106 gram di cocaina y 365 gram di marihuana. E ta haya e acusacionnan proba, incluyendo esun di posesion di arma di candela. Fiscal a dicidi di saca un man y wak si di berdad e acusado aki kier ayudo. El a pidi un castigo di 30 luna di prizon di cual 6 luna ta condicional y dos aña di prueba. Tambe a pone bou guia di Reclassering. Dia 7 di juli lo tin sentencia den su caso.
