Diamars, den oranan tempran di anochi, dos hoben a caba di hunga biyar pa despues bay yena e pickup cu gasolin. Pero nan tabata tin mala suerte, pasobra biniendo abao, pasando e rotonde di Bright Bakery, e auto a cuminsa saca candela.
Mesora nan dos a baha for di e auto y para e auto un banda. Manera cu nan a habri e hood, nan a purba di paga e candela cu nan flanel.
Pero esaki a sigui crece, te cu a kima full e parti dilanti di e pickup. Segun un di e hobennan, ta algun dia pasa nan a cambia gearbox di e pickup. Awo e pickup a kima.
Mientras tanto mayornan di un di e hobennan a presenta y a bay off riba amigo di nan yiu, bisando cu ta pa su via tur e cosnan aki ta pasa, insinuando cu ta e kier hiba e yiu bay hunga biyar. Fuera di polis, brandweer tambe a presenta na e sitio, pa asina paga e candela. Daño causa na e auto ta considerabel.
