E comienso di e iniciativa di “Biba Amor” tabata hopi bunita pasobra tabata grito di nos hobennan cu tabata desea informacion corecto pa nan por tuma decisionnan corecto pa loke ta nan desaroyo sexual y a bras’e y a cuminsa cun’e for di aña 2009.
Pharetza Bertad-Damon ta traha na ministerio di salubridad, medio ambiente y naturalesa na Corsou y ta traha tambe como enfermera publico y coordinado di e programa “Biba Amor: educacion responsabel y saludabel.” El a splica cu nan ta draai den scolnan catolico, publico y PPCO, cu asina den un scol sigur, e muchanan por haya informacion corecto pasobra ta a base di informacion corecto, esaki por contribui na tuma decisionnan corecto.
Embaraso Hubenil
No a yega caminda cu nan kier yega ainda, pero ta satisfecho cu e cambionan cu ta mirando, pero esey ta nifica cu tin cu sigui traha. No por para keto ainda. Tin cu yega ainda mas leu. Ta conciente cu no por bah’e na 0, pero si tin cu bah’e na tal forma, cu mas hoben ta hiba un bida sexual saludabel y ni bay tuma riesgo pasobra e por salibo di malo.
Curso
E curso no a yega te eynan, pasobra pa Aruba a adapt’e. E programa ta consisti di 12 modulo. Debi cu a cuminsa den grupo 7 y 8, esta 5de y 6de klas, a adapt’e na aña 6 modulo, Intencion ta pa den futuro pa sigui traha hunto y asina haya tur e 12 modulonan. Asina e ta sigui subi y haci e pakete completo.
Acogida cerca docentenan
Tin cu bisa cu en realidad ora cu papia riba sexualidad, no ta tur hende por papia riba dje. Pero ora mira e meta cu nan tin cu traha hunto pa minimalisa embaraso hubenil y e malesanan transmiti sexualmente, bo ta mira con e flor ta cuminsa habri, e aceptacion. Bertad-Damin ta hopi contento con e maestra y maestronan a hinca tur di nan pa e materia yega bibo bibo cerca e muhanan.
Aplicabel
Den e programa mayornan tambe ta envolvi. Pesey ta duna e mayornan splicacion kico e yiunan ta bay haya pa nan no pensa nada robes. Hunto cu esaki tin cu bisa cu na momento invita mayornan pa bin anochi di informacion pa nan ta mesun liña cu nan y sa kico e yiu ta haya, cu ora e yiu bin cas of kisas for di den auto mes, cuminsa haci pregunta pa e mayornan prepara, nan no ta bin manera ta desea. Pero esey no ta pone nan para keto. Ta sigui, e lucha ta nos tur tin cu hib’e.
