Alcohol y Droga cu ta dos criminal den famia cu tur dia ta halsa y promovi manera cuminda, ta un causante primordial di nos crisis social. Hende keto bay ta kere cu ta solamente COVID y falta di trabao ta hinca nos den crisis social. Nos ta duna Gloria na Dios na e momento cu por bin bek riba pia, y cu porta di trabao por habri bek riba nos isla, y cu negoshinan berdadero y limpi, integro lo wordo estableci, caminda hende por sinti nan mes bon manera semper ora nan por menciona e compania, of negoshi cu nan ta traha p’e.
Bebemento, no ta cos di awe, pero ora e sali for di man, e ta bira buracheria y despues bo ta cay den alcoholismo, asina bira un persona cu no por sin alcohol y cu ta bebe hasta na momento cu bo ta riba trabao.
Tin hende ta defende nan mes bisando cu ningun caminda den Bijbel, no ta bisa pa no bebe, pero nos kier recorda tur hende , cu tur tipo di goloseria ta pica, pasobra si bo come hopi, sin control bo ta bira obeso, y obesidad ta trece malesa, y mesun cos si bo ta bebe hopi , bo ta falta respet pa hende y hende lo falta respet pa bo, bo ta bira alcoholico, y alcoholismo ta produci hopi enfermedad.
Palabra di Dios no ta defende maldad y ta splica hopi cla cu buracheria no ta aceptabel, den bista di Dios, y tambe no bin cu e chiste custumbra di e historia cu Hesus mesa parti biña na e casamento di Canaan, pasobra esey tabata biña no fermenta, pasobra ora bo primi druif pa traha biña mas tanto e para mas sterki e bira y bo no tin mester di pone ningun kimico den dje.
Mayoria bebida sterki awendia ta contene kimico y ningun hende no por determina, cuanto nan ta bebe prome cu nan bira burachi, tur cos ta depende di bo presion di sanger, di bo comemento, y tambe di bo descanso, pero pa un hende cu ta stima su famia nos ta desconseha bebemento totalmente, pasobra alcohol ta caba cu famia y te awe tur hende cu a purba caba cu alcohol, ta bao di tera.
Pa refresca memoria di esnan cu ta pretende cu e bandera di alcohol, mester hisa tur dia den nan bida, no ta importa na unda nan ta, sea nan ta riba trabao, y trabao di responsabilidad grandi, hefe di departamento, hende den funcion publico, hende cu merdia den nan break ta bay den nan auto bay dal dos bitter di whisky pa nan por sigui traha. Ata locual Bijbel ta bisa lesa esaki pa bo mes :
Pa e hoben mucha homber/muhe. Deutoronomio Capitulo 21; 20-21.
Pa tur hende grandi homber/muhe cu ta pretende cu mester bebe y cu ta destrui nan cas y nan famia y caba cu nan propio integridad y pone nan salud na peliger.
Proverbio 20 ver 1. Proverbio 21:17. Proverbio 23:30-31 t/m 35.
Isaias Capitulo 5 vers 11-12.
Tito 1 vers 7. Tito 2 vers 3.
Romanos 13 vers 13.
Y si te ainda bo tin defensa pa sigui bebe y sconde tras di cualkier fabula, of bisa cu orguyo ta mi placa, mi ta bebe cuanto cu mi kier, nos kier bisa bo cu un hende cu ta bebe tur dia. Ta den rebeldia contra Dios. Ta berdad cu Apostel Pablo a yega di bisa pa bebe un tiki biña pa bo stoma ora bo tin e problema ey, pero ningun caminda no ta para skirbi pa hala alcohol manera un tanker, manera alcohol ta bida, y asina perde control di bo actitud y pone bo hogar y comunidad na peliger. Un persona cu di curason kier sirbi Dios no ta bebe.
Alcohol ta pone cu bo no por rasona, ni cerca hende ni tampoco cerca Dios, Spirito Santo no ta presente caminda alcohol ta domina, no laga diabel gaña bo, pidi Dios yuda bo pa asina kibra e bicio di alcohol for di riba bo bida, y no discuti, pero obedece e Palabra di Dios. Obediencia ta miho cu sacrificio.
