E tempo ta cortico, hopi hende sa, pero hopi ta rechasa, y hasta haci bofon di e palabra di Dios y e mandato di Dios.
Divorcio y division den famia, casi a bira un tradicion, temor di Dios ta aleha tur momento, y Dios ta stima nos tur igual, sin distincion di persona.
Bijbel ta papia cu nos no por tuma locual mundo ta ofrece, pero cu nos mester renoba nos mente,pa nos por sa cual ta e boluntad perfecto di Dios.
Nos mester bandona e locual cu mundo ta ofrece, y acepta e plan di salbacion cu Dios ta ofrece na mundo henter, awor cu nos ta na biba, pasobra despues di morto nada no por wordo ahusta.
Den Galationan 5 versiculo 19-21, bijbel ta avisa nos cu locual e obranan di carni cual ta impedi nos di drenta den e reino di Dios.
Tin hende ta sinti nan mes manera husga ora locual ta presente den nan bida, wordo papia pero e berdad ta cu nos mester tene cuenta cu locual Dios ta bisa nos.
E obranan di carni ta:
· Inmoralidad, cual ta conoci pa tur hende awendia den un forma extremo.
· Impuresa: locual Dios ta bisa nos pa nos ta puro den tur cos. y di curason.
· Sensualidad: e engaño di siglo.
· Idolatria: E engaño for di principio di mundo.
· Bruheria: Awendia bruheria ta hinca den tur cos.
· Hostilidad: Violencia tur caminda.
· Bringamento: algo casi inevitabel awendia.
· Jaloersheid: Aki nan nos ta mira presencia di e malvado.
· Rabiamento: Locual ta haci daño na hende y rabia no ta obra pa bondad.
· Pleitamento: Locual Dios ta bisa pa nos evita tur momento.
· Desacuerdo: un señal di ultimo tempo.
· Doctrina Falso: Locual hende kier siña hende.
· Envidia: ta e fruta di scuridad.
· Buracheria: algo cu ta cabando cu Famia.
· Paranda: Algo cu Dios ta avisa pa nos libra for di dje.
Y e cosnan asina aki di cual mi ta spierta boso di antemano, mescos cu mi a spierta boso di antemano, cu pesnan cu practica sorto di cos asina aki lo no hereda e reino di Dios.
Bijbel ta menciona 15 cos cu hende ta practica cu ta stroba nan di drenta reino di Dios. Awor tur cos ta indica na nos cuanto nos ta balora e salbacion,cu nos bon Dios ta ofrece na nos.
E palabra ta indica na nos cu tras di cada obra di carni tin un mal spirito, presente , pasobra obranan di carni ta bini for di e mundo si scuridad.
Ta bon pa nos coy un inventario di nos bida, pa nos por sa si tin algo di e obra di carni presente den nos mes bida, den nos cas y nos famia, pa asina nos por pidi Dios yuda nos libra nos y duna nos forsa pa persevera y asina alcansa su reino.
E posibilidad t’ey cu aunke cu un hende por ta den Cristo, e por wordo ataca door di e obranan di carni, cual nan ta bringa e presencia di Spirito Santo den nos bida.
Y es mas awor cu e tempo trabahoso ta manifesta (2 Timoteo 3:1-9) e obranan di carni ta rebeldia dia pa dia den e yiunan di desobediencia, cual ta haci nan esclavo di scuridad.
No perde tempo bisa cu hende ta husga bo, riba locual ta para skirbi, pasobra locual ta para skirbi ta conta pa tur hende, sin excepcion,pasobra tur hende mester duna cuenta na Dios.
Dios ta stima tur hende, y E kier duna oportunidad pa arepenti.
Sinceramente,
Pastoor Marcel Balootje.
