Durante su ultimo reunion miembronan y personal di Contraloria General a despedi di drs. Lay Hing de Kort-Yee, como miembro fiho di dicho organisacion. Durante e periodo di 22 november 2017 pa 23 di februari 2021 Sra. de Kort-Yee, a dedica su conocemento y pasion pa defende e interes general di comunidad di Aruba.
Pa medio di e investigacionnan di Contraloria General, como organo halto di control di Pais Aruba, Parlamento por pone cada minister responsabilisa su maneho ehecuta.
Cu e despedida di Sra. de Kort-Yee, e proceso pa haya candidatonan capacita y adecuado a bira mas urgente. Candidatonan mester por cumpli cu exigencianan conforme Ley di Contraloria General (AB 1998 no. GT 20) y pasa tambe entre otro un evaluacion. Despues di ricibi resultado di e evaluacion, Contraloria General ta tene un combersacion cu cada posibel candidato cualifica. A base di e resultado di e evaluacion y combersacion, Contraloria General mester haci un proposicion na parlamento di por lo menos 3 candidato cu lo ta cualifica.
Ta spera pa final di april proximo por logra haci un proposicion. Si esaki no logra of no ta exitoso, lo informa parlamento di e resultado di e proceso pa haya candidatonan capacita y adecua.
Contraloria General ta desea Sra. drs. Lay Hing de Kort-Yee hopi exito den su futuro carera.
