Un feliz dia y hopi bendicion y un bon siman pa Aruba completo. Pablo a bisa den Juan Capitulo 3 verso 30 lo siguiente: E mester aumenta, ma ami mester bira menos. Un biaha mas den Juan Capitulo 3 verso 36, Pablo ta bolbe remarca : Esun cu kere den e YIu tin bida
eterno: Ma esun cu no obedece e Yiu lo no no mira bida , ma e furia di Dios ta keda riba dje.
Hopi biaha ora nos ta scirbi e berdad, no ta tur hende kier publike, pasobra berdad ta duru y berdad ta sacudi hende, pero te awe ningun hende no a muri ora nan a tende , mira of scucha e berdad. Awendia tin hopi ta cuestiona e Palabra di Dios pasobra e berdad ta bay contra nan ideologia, y e Berdad ta molestia, ora nos no kier biba pa e Berdad, y semper nos ta bira Defensivo, y hasta ta sinti nos ofendi pa e Berdad, y nos kier troce e Berdad, pa acepta un mentira.Nos kier gaña nos mes pa mantene un Capricho na bida , cual den dje no tin nada di Berdad. Juan 8:31+32 Hesus a bisa y boso lo conoce e Berdad y e Berdad lo haci boso Liber.
Ora nos ta purba halsa nos mes y laga Dios afo, hopi ta bin ripara cu na final nos meta no ta wordo logra. Kico nos kier bisa cu esaki: Cu Dios mester tin e prome lugar den tur locual cu nos ta haci, Pasobra Dios ta Todopodero. Orguyo ta pone nos kere cu nos ta doño di nos bida, y segun nos orguyo crece nos ta hasta kere cu nos ta doño di hende, pasobra orguyo ta base di tur clase di disciminacion.
Dios nunca a duna hende dominio riba hende .Tur cos ta cuminsa cu orguyo. Den un Famia, aunke e tata ta cabes di cas , ta e ta esun cu tin di humiya su mes dilanti di Dios , pa asina su cas ta bendiciona, y su famia lo crece. Pasobra serca Dios no tin grandi ni tampoco professional, na ningun lugar den beibel ta scirbi cu nos ta professional, ni tampoco prominente , ni tampoco hende di influencia, pasobra tur esnan cu ta sirbi Dios ta wordo yama siervo di Dios. Y mas bo sirbi cu humildad mas Señor lo halsabo, mientras cu abo sigi ta duna Señor e Gloria.
Ora mayornan ta trata e presupuesto di cas, nan ta cuminsa baha nan gastonan prome , y despues pone na conocemento di nan yiunan,con e muchanan su gasto lo wordo baha, kiermen si tin di baha gasto den cas, tata y mama ta esnan cu di prome mester corta den: Happy Hour, 2 Auto, bebe tur fin di siman,gamble, byside, vicio, capricho,etc, etc. Pero ora e orguyo ta halto e falta di comprendemento ta cana hunto cune y na final nos ta mira henter un famia wordo sacrifica pa Orguyo di dos mayor. Ora tin un discussion den cas e tata y e mama ta prome yama pa sinta cu otro y resolve e situacion, pasobra Matrimonio ta institucion forma entre dos persona y Dios, y ora orguyo ta domina, hopi famia ta wordo kibra y desampara pa motibo di dos persona cu no kier resolve, ni tampoco ta acepata mediacion y por ultimo ta tuma un posicion irreconciliabel, den cual nan ta lubida e bienester di nan yiunan.Y nan no kier acepta cu PORDON ta e yabi pa tur solucion. Nan no kier ningun ayudo, nan ta bisa cu ningun hende no ta manda riba nan, di ningun manera nan no kier acepta nan fout, pasobra aceptacion ta e base di restauracion,y e spirito di orguyo ta bay contra humildad, pasobra hende humilde ta wordo restaura, pero e orguyoso lo wordo kibra, pasobra beibel ta bisa cu orguyo ta bini prome cu caida.
Si un persona ta malo, e por rechasa su malesa, pero si e tin di acepta e cuido y ayudo necesario , pa asina preveni cu e malesa ta avansa, y eynan e ta cuminsa e lucha pa recuperacion. Si un persona ta stima su famia, e ta haci tur locual ta posibel, pa e recupera y asina bira un ehempel pa su cas. Nos ta bibando den tempo di Crisis, e ta mundial, e ta ferfelo, pero e NO tin mas poder cu Dios, no laga miedo domina bo, lucha pa locual cu bo tin, tene duru na e Palabra di Dios, nos mester mengua pa asina Dios por crece den nos.
Nos ta lagabo cu e versiculo aki Isaias 26 vers 3+4.
