Relaciona cu un articulo publica diadomingo 5 di juli riba 24ora.com caminda Youth Contractors ta insinua cu SVb a para su subsidio di salario, e banco di seguro social a subraya cu no ta para subsidio di salario di ningun dunado di trabao. Pa bin na remarca pa e subsidio, e dunado di trabao mester haci peticion durante e periodo indica y suministra e informacion rekeri. Na momento cu cumpli cu esaki, SVb
ta otorga un adelanto riba e subsidio di salario. Bisando esey, ta obvio cu si Youth Contractor no a ricibi pago ta pasobra e no a entrega un peticion na tempo tampoco!
Banda di otorga e subsidio, SVb ta supervisa cu e subsidio ta yega cerca e trahado. Ora drenta keho na SVb, ta investiga pa determina si e kehonan tin base. SVb a haya hopi keho di trahadonan, specialmente di esunnan trahando pa ‘uitzendburea’ nan. SVb ta constata abuso di trahado y violacion di nos leynan laboral. Ta constata tambe cu companianan cu mas di 200 trahado y cu sigur tin ‘omzet’ di miyones, tin un administracion full bruha. Cualkier empresa cu un administracion drechi mester por sa pa kendenan el a ricibi subsidio dia 15 di mei.
E administracion di Youth Contractors ta laga di desea
SVb ta manda pa e dunado di trabao un lista detaya di cuanto placa ta ricibi y pa ken, tanto na salario como pa gastonan di e dunado di trabao. E informacion ta yega cerca e dunado di trabao completo y no ta unicamente duna un suma sin mas. Ta increibel cu awe dia 6 di juli un empresa cu a ricibi subsidio no sa si e mester entrega subsidio bek na SVb of no.
SVb ta reconoce tambe e cantidad grandi di bon dunadonan di trabao cu ta cumpli bon cu nan trahadonan. Ta cumpli cu e rekesitonan y ta duna di nan banda. Pabien na nan! E dunadonan di trabao ey ta ehempel y ta representa futuro economico di nos pais.
No tin informacion ainda riba pago di juli
Na SVb ta drenta preguntanan riba e subsidio di juli. Na e momentonan aki SVb no a haya instruccion di gobierno pa cuminsa e proceso. Na momento cu ricibi esaki, SVb lo comunica e informacion necesario na su clientenan.
