E ta un dia special y di hopi amor, en todo caso, pa mayoria hende. Depende na cua pais bo ta hasta. Na Latino America (LATAM), ta celebr’e riba 24 di december (Noche Buena) mientras cu na Aruba y gran parti di mundo ta celebr’e riba 25 di december mes.
Ekipo di Headlines Group a puntra diferente persona kico Pasco ta nifica pa nan. E contestanan tabata varia. Pa mayoria, e ta nifica hermandad, paz y harmonia. Mientras cu algun a vocifera cu e ta e momento perfecto pa pordona otro. Pa un grupo chikito, e no tin nificacion mes. Sea ta pa motibo di creencia of labor.
Mescos cu polis, brandweer, ambulance, personal medico, prensa y esunnan cu ta traha den horeca, e ta un dia comun y coriente, trabou ta sigui.
No obstante e diferencia den reaccion pa cu nificacion di Pasco, Headlines Group, cu t’e cas editorial di e website www.24ora.com y e matutino digital, TREMPAN, ta desea Aruba y mundo henter un Feliz Pasco. Celebr’e den famia y laga e dia aki t’e ocasion perfecto pa pordona otro, manera un di e personanan a indica durante e encuesta.
