“Partido CURPA a dicidi di no participa na e cumbre politico mirando cu Gobierno no kier duna nos e documento di Hulanda cu e 18 condicionnan”, asina Max Robert, Presidente di partido CURPA a skirbi den un relato. “Nos a puntra Gobierno pa esaki y a haya como contesta cu Hulanda kier pa e documento keda secreto”.
Sin un documento bo no por prepara pa un reunion y duna bo opinion drechi y pesey no ta responsabel pa participa na un reunion asina, di acuerdo cu e lider politico. “Bo no por ta serio. Nos sa cu ta asina e politiconan tradicional ta traha pesey nan a firma y grita voor pa un CITCO deal malisimo den pasado sin lesa e contract”.
“Nos no ta traha bruha asina y ta pidi pa transperencia. Partido CURPA desde 2015 a bisa cu Hulanda no kier traha ni cu MEP y ni AVP. Partido CURPA tin un solucion briyante con pa haya nos autonomia bek y crea un win-win situation pa gobierno di Hulanda y e pueblo di Aruba”, asina Max Robert a sigura awe.
“Semper partido CURPA tin solucion pa tur problema y reto. Nos a gradici gobierno pa e invitacion y a pone Rijksminsterraad, Staatssecretaris Knops y Gobernador di Aruba na altura”, asina e lider politico a termina bisando.
Max Robert a funda Cristiannan Uni Reforsando e Potencial di Aruba (CURPA) dia 20 di Mei 2009. Lidernan desde fundacion: Cristina Lampe (2017). A participa 2 biaha den eleccion. Record maximo di voto: 468 (2017) y Record minimo di voto: 139 (2009). Ideologia di Partido CURPA ta Liberal.
