A base regular e comishon fiho di Parlamento encarga cu asuntonan Hudicial ta reuni cu Minister di Husticia mr. Andin Bikker roba diferente aspecto di su maneho. Den cuadro di e ultimo desaroyonan, Presidente di e comishon, Rocco Tjon MBA, a convoca un reunion mañan diamars. Lo elabora riba diferente topico, pero specificamente e ultimo desaroyonan di asilo y siguridad na frontera.
DESAROYONAN ACTUAL
A base di Tratado pa asilo, Corte a dicidi cu 13 persona procedente di Venezuela cu a yega tera recientemente mester haya e asina yama “meldplicht” te ora cu e proceso di nan peticion pa asilo keda cla. Obviamente e desaroyo aki a causa consternacion den comunidad.
MEDIDANAN DI MANEHO
Mirando e desaroyo aki Minister Bikker mesora a asigna centro di Guarda Nos Costa como luga caminda esunnan cu pidi asilo mester permanece obligatoriamente. Es decir esunnan cu pidi asilo no por cana liber pero mester permanece na e centro aki. Despues cu e proceso di nan peticion termina y resulta cu nan no tin derecho riba asilo nan lo wordo deporta.
PA CONCLUI
E diferente medidanan di maneho ta positivo y p’esey Parlamento kier reuni di forma urgente cu Minister. Ta importante pa sa di Minister si mester di mas fondo pa ehecuta e pasonan menciona. Na mes momento tambe ta importante pa wak y debati posibel consecuencianan legal y financiero y tambe delibera riba e pasonan necesario cu mester tuma pa nos siguridad interno y na nos fronteranan, asina Rocco Tjon (MEP) a termina bisando.
