Parlamentario pa partido MAN sr. Wimbert Hato dia 17 di òktober 2017 a dirigí un karta na Presidente di Parlamento den kua e ta pidi pa introdusí un oloshi digital den Parlamento di Kòrsou.
T’asina ta ku te algun tempu pasa tabata usa e sistema antikuá di mustra ku dede kuantu tempu e parlamentario ku ta hibando palabra a sobra. Esaki tabata trese hopi diskushon pasobra algun Parlamentario no tabata di akuerdo hasta tabatin okashon kaminda a akusá presidente di Parlamento di a kita òf kòrta tempu for esnan ku ta hiba palabra. Ku introdukshon di un oloshi digital tur parlamentario mes por mira kuantu tempu e la sobra. Introdukshon di e oloshi digital a tarda un tiki pasobra personal di Griffie kier a hasi algu bon I na òrdu.
Djaluna 9 di aprel pa promé biaha durante di un reunion di Parlamento a hasi uso di e oloshi digital. E oloshi a ser instalá di tal manera den e pantayanan den parlamento ku e ta kuminsá konta segun e tempu duna pa kada tópiko bai terminá na sero. Pues un biaha mas e parlamentario na palabra mes por kontrolá kuantu tempu e la sobra pa papia. Un Danki na personal di Griffie i Presidente di parlamento ku nan a honra e proposishon di parlamentario Hato i a traha riba esaki. Esaki ta un logro ku ta duna nos parlamento un kara di ta mas moderno, mas profeshonal I ku un biaha mas ta solushoná posibel problema den prosedura i konsiderá esaki un stap importante pa loke ta trata transparensia ora ta trata reunion di Parlamento.
