Bijzondere Commissie Sustainable Development Goals di Parlamento di Aruba, bao direccion di su Presidente, Ruthlyn Victoria Lindor, a trata awe e situacion urgente rond di escasez di parteranan na Aruba y sostenibilidad financiero di cuido prenatal, durante parto y postnatal.
E preocupacion principal ta continuidad di cuido
Aruba a pasa di 8 partera pa actualmente 4. Segun e informacion presenta, pa september 2027 e cantidad por baha te na solamente 3 partera pa henter Aruba. “Nos no mester warda pa e sistema yega na un punto critico, of pa algo pasa, prome cu nos actua. Liderazgo responsabel ta identifica riesgo prome cu e bira un crisis”, Lindor a declara.
E tema a ricibi atencion amplio den Parlamento y ta uno cu ta trascende diferencia politico. Salud y siguridad di mama, baby cu ainda no a nace, baby recien y sostenibilidad di e profesion di partera ta un responsabilidad comparti.
E asunto ta directamente conecta cu Sustainable Development Goal 3, Good Health and Well-being, SDG 5, Gender Equality, y SDG 8, Decent Work and Economic Growth. E Minister encarga cu Salud Publico, drs. Melvin Wyatt Ras ya a reacciona positivamente riba e preocupacionnan presenta y a mustra disponibilidad pa continua traha na un solucion sostenibel.
Riba 5 di october caba, Presidente di Bijzondere Commissie SDG, Ruthlyn Lindor, a solicita un reunion cu AZV pa profundisa riba e aspectonan financiero, contractual y organisatorio di e tema aki. Nos ta spera cu e reunion por tuma luga den e siman cu ta bin, cu pleno respeto pa e responsabilidad y experticio di cada instancia. Despues di esey, e dialogo lo continua cu Minister di Salubridad y Asociacion di Partera, cu e meta pa realisa un solucion sostenibel y concreto.
Un posibel direccion cu merece evaluacion ta un modelo inspira riba e principio di Huisartsen Onder Eén Dak, unda conocemento, capacidad, infrastructura y cierto gastonan operacional por wordo comparti, mientras cada profesional ta conserva su responsabilidad profesional.
Lindor tambe a destaca cu e discusion no por limita solamente na costo.
“Cuido prenatal ta prevencion. Detecta riesgo na tempo por evita complicacion, sufrimento y gastonan di cuido mas grandi despues. E pregunta no ta solamente cuanto cuido ta costa awe, pero tambe cuanto falta di cuido por costa nos mañan.”
E posicion di e parteranan mes ta igualmente importante. Varios di nan a studia afo, a bolbe Aruba y a scoge pa sirbi nan pais. Den un periodo unda Aruba ta papia constantemente di brain drain, e profesionalnan cu ta bolbe ta representa brain gain cu mester balora y retene.
“Respet pa nos profesionalnan di salud no ta solamente bisa danki. Respect tambe ta pa crea condicionnan digno, stabilidad, pago husto y oportunidad pa nan por construi un bida sostenibel mientras nan ta cuida otro.”
E meta di e proceso no ta pa punta dede ni crea confrontacion entre institucionnan.
E meta ta accion.
E meta ta prevencion.
E meta ta un solucion cu ta protege mama, mucha, profesional di salud y continuidad di cuido pa henter Aruba.
“Tin temanan cu ta mas grandi cu politica. Continuidad di cuido pa mama y yiu ta uno di nan. Parlamento di Aruba ta uni riba e responsabilidad aki y nos ta kier actua prome cu e problema bira un crisis.”
