Minister di Husticia, mr. drs. Arthur Dowers, a trece un mensahe fuerte dilanti tocante e maneho di inmigracion y e situacion di personanan cu ta biba den e pais aki sin un permiso legal. E mandatario a subraya cu e reglanan ta cla y cu Gobierno lo actua severamente contra esnan cu no ta cumpli cu e leynan di admision y penal di Aruba.
Durante su declaracion, Minister Dowers a enfoca riba e preocupacion di personanan bou di edad cu ta keda na Aruba sin un status legal, unda hopi biaha nan ta encontra nan mes den un situacion dificil pa haya un caminda pa progreso.
E minister a aclaria cu si personanan cu a haya un permiso bou di e programa “Hunto pa Progreso” y tin un yiu menor di edad cu no tin permiso, por haci uzo di e chens cu ta bay duna awo. Normalmente, e reglanan ta exigi cu e personanan concerni mester bolbe nan pais di origen pa haci e tramitenan.
El a splica cu despues di e tempo cortico di gracia “si bo bini cu un mucha despues di e fecha aki, y e mucha keda ilegal na Aruba sin un permiso, e riesgo di wordo deporta ta grandi,” Minister Dowers a duna di conoce. Gobierno ta enfatisa cu e meta no ta pa actua contra e ciudadano sin rason, pero pa percura pa e sociedad keda maneha na un manera responsabel y ordena.
Minister Dowers a remarca cu e intencion ta pa hende comprende cu e tema aki ta serio. Aruba kier pa e hendenan cu ta permanece riba e isla hiba un bida digno y contribui na e desaroyo positivo di e pais. Sin embargo, esaki ta nifica tambe cu mester pone un fin na e situacionnan caminda personanan ta biba den e margen di sociedad y ta enfrenta problemanan financiero of medico grandi sin por cubri esakinan.
E mandatario a haci un apelacion directo na tur esnan cu pa un tempo largo ta biba na Aruba sin tin nan documento na ordo, cu e periodo cortico di tolerancia a pasa caba, y cu esnan cu bini despues sin un permiso ta wordo trata na un manera estricto y conforme e leynan existente.
Pa conclui, e mandatario a reitera cu e lucha contra e ilegalidad ta un tarea di tur dia pa mantene siguridad y ordo den pais Aruba.
