All inclusive’ no ta e tipo di hotel mas ideal pa promove negoshi local, paso e huespednan por ricibi diferente servicio den e hotel “on site”mes. Di un banda, ta comprendibel di con e tempo ey a scoge un ‘all inclusive’, pa motibo cu no tabatin suficiente comercio den San Nicolas pa sirbi e grupo grandi di cliente di e hotel. Esaki ta loke cu parlamentario Alvin Molina (MEP) ta splica den un declaracion manda pa prensa.
Molina ta kere cu pa hotel Secrets trece un ‘spin off’ positivo pa Aruba y specialmente pa e area pariba di brug, lo mester keda dialoga continuamente cu gerente di hotel y departamentonan gubernamental concerni. “Mi ta sumamente contento cu gerente di e hotel ta dispuesto pa colabora cu gobierno riba varios topico na bienestar di nos ciudadanonan.”
Un punto hopi importante ta e cuponan di trabou cu un hotel nobo lo bin cu ne. Mester percura pa mas tanto posibel nos hendenan local haya e prome oportunidad pa ocupa e funcionnan den tur departamento y riba tur nivel. Hendenan cu ya caba ta traha den sector hotelero na Noord, pero ta biba pariba di brug, pa nan tin e oportunidad pa traha cerca di cas, cu lo spaar nan algun ora pa dia y alrededor di 400 pa 500 florin mensualmente na transporte.
“P’esey, mi a haci un peticion na nos Minister di Labor Glenbert Croes pa organisa un “job fair” na San Nicolas. En conexion cu esaki, varios reunion ya caba a tuma luga cu gerente di Secrets Hotel/Three Rivers, Minister Glenbert Croes, Departamento di Labor, Enseñansa pa Empleo y oficina Edison Briesen. Tambe e peticion ta encera pa duna curso/training na esunnan cu tin e deseo pa ocupa cierto funcion den hotel, pero kisas falta un tiki conocemento y/of experencia. Secrets ta e prome y ‘hopefully’ e ultimo hotel grandi pariba di brug. Nos tin cu percura pa e ta un proyecto beneficioso pa nos hendenan,” Molina a bisa.”
