Despues di su cover songs ‘To Love Somebody’ y ‘Ain’t no Sunshine’, e artista vocalista Nando Chirino ta lansa un otro cancion romantico den e genero kompa.
E tema ta hiba e titulo di ‘Turn your lights down low’,un cancion di Bob Marley & The Wailers for di nan album di 1977 Exodus”. E ta un slow reggae, tocante un anochi romantico di Bob Marley. E cancion aki ta keda un faborito den reggae, y awor un cover den e genero kompa presenta pa Nando Chirino.
Den e ultimo dos añanan Nando tabata hopi exitoso cu su cancionnan ‘To Love Somebody’ cu ainda ta resona bon na radio emisoranan y den fiestanan toca pa nos DJnan y bandanan local y tambe ‘Ain’t no Sunshine’ ambos cancion cu a sa di score halto den e top charts na Aruba, Corsou, Boneiro y Surinam.
Nando Chirino ta trece cover songs, evergreen den e estilo kompa cu ta masha gusta pa hoben y adulto y ta trahando riba un EP estilo kompa di cancionnan clasico, cover songs, y e cancion nobo aki ta e di tres tema cu lo forma parti di su EP.
Nando ta hopi contento y agradecido, en special na e Pueblo di Aruba pa e apoyo y aceptacion di su cancionnan den e genero kompa.
Areglo di e tema nobo aki ‘Turn your lights down low’ tabata den man di Mark Maduro (Markkeys) y pa Stanley Clementina, e final mix/master tabata realisa pa Sean Cannister, e recording studio ta Steez Music na Hulanda, y e videoclip a keda na encargo di S.O.G. Twan Productions.
Por disfruta di e cancion ‘Turn your lights down low’ (version kompa) riba e plataforma di YouTube, y tambe por scucha e tema aki riba diferente otro plataforma digital manera; ‘Spotify, Apple Music y Distrokid’.
