KLM mester paga un boet di 320 mil dollar na Merca despues cu e compania a bula mas di shen biaha na un altura prohibi riba Irak, asina e website Hulandes NOS a informa. E vuelonan, cu a tuma luga durante mas di tres aña, tabata viola restriccionnan di siguridad pa uzo di espacio aereo, loke a resulta den un sancion pa e compania Hulandes.
E vuelonan a tuma luga entre januari 2022 y mei 2025. Durante e vuelonan aki, avionnan di KLM a bula na un altura mas abou cu 32.000 pia, casi 10 kilometer, riba teritorio di Irak, algo cu no tabata permiti segun e reglanan aplicabel.
E restriccionnan ta forma parti di medida di siguridad pa espacio aereo den regionnan unda tin riesgo, por ehempel pa motibo di conflicto militar.
Segun Departamento di Transporte di Estados Unidos, e vuelonan tabata viola e condicionnan cu KLM a acepta den su acuerdo di colaboracion cu Delta Air Lines. Den un acuerdo di codeshare, dos compania por ofrece asiento riba e mesun vuelo bou di diferente number di vuelo, pero tambe por tin restriccionnan tocante e espacio aereo cu nan por uza.
“Bou di e gobierno di Trump, cumpli cu nos reglanan di siguridad no ta algo opcional”, Minister di Transporte Mericano Sean Duffy a declara. El a agrega cu e gobierno lo tene companianan aereo responsabel ora nan no cumpli cu e reglanan.
No ta cla pakico KLM no a cumpli cu e restriccionnan.
Air France tambe tin cu paga boet
Air France, compania hermana di KLM, tambe a haya sancion despues cu e a bula 30 biaha den e zona prohibi. E caso ta parti di un acuerdo cu e grupo Air France-KLM a yega cu Departamento di Transporte di Estados Unidos. E suma total di e boet ta 425 mil dollar.
Di e suma aki, 265 mil dollar mester ta paga dentro di 60 dia. E resto solamente lo mester ta paga si e companianan bolbe bula den espacio aereo prohibi durante e proximo aña.
Un vocero di KLM a declara cu e compania ta comprometi pa cumpli cu tur reglamento di aviacion aplicabel. Tambe ambos aerolinea a tuma medida pa fortifica e cumplimento di restriccionnan di espacio aereo pa futuro.
