Minister di Deporte, mr. Gerlien Croes, tabata tin un reunion productivo cu e representantenan di World Baseball Softball Confederation (WBSC), hunto cu Comite Olimpico Arubano (COA), pa dialoga tocante e futuro di baseball y softball na Aruba, cu enfasis special riba bon maneho, fortalecemento di e structura organisatorio di nos federacionnan deportivo y ampliacion di oportunidadnan di capacitacion.
E encuentro a tuma luga den cuadro di e bishita di e delegacion di WBSC na Aruba, durante cual e organisacion internacional a sostene diferente reunion cu COA y e federacionnan nacional, Aruba Baseball Bond (ABBA) y Aruba Softball Bond (ASB). Como parti di e programa, a organisa tambe un curso di Baseball5, cu ta contribui na ampliacion di conocemento y desaroyo di e disciplina aki na nos isla.
E delegacion di WBSC tabata representa door di Victor Isola, representante pa e continente Panamericano y responsabel pa facilita comunicacion y cooperacion cu e federacionnan nacional; Marco Ienna, Chief Operating Officer (COO) di WBSC, cu ta hunga un rol importante den temanan di maneho, integridad, antidoping y responsabilidad social; y Randolph Oduber, miembro Arubano di e directiva di WBSC.
E reunion a conta tambe cu presencia di Nicole Hoevertsz, Secretaria General di Comite Olimpico Arubano, cu a hunga un rol importante den coordinacion di e bishita y e acercamento entre WBSC y e diferente organisacionnan deportivo local.
Bon maneho y federacionnan fuerte como base pa desaroyo deportivo
Durante e intercambio, Minister Croes a enfatisa cu desaroyo sostenibel di deporte no ta depende solamente di talento di nos atletanan, sino tambe di e manera cu nos organisacionnan deportivo ta dirigi, organisa y sosteni.
Un di e temanan central di e reunion tabata e importancia di fortalecemento di e statutonan, transparencia, responsabilidad administrativo y bon maneho dentro di e federacionnan nacional. E aspectonan aki ta esencial pa crea organisacionnan mas solido, cu por brinda un miho sosten na atletanan, coachnan y tur esnan cu ta contribui na deporte.
“Aruba tin un historia rico y un talento extraordinario den baseball y softball. Pero pa nos sigui crece y competi na un nivel mas halto, ta esencial pa nos fortalece no solamente e aspecto deportivo, sino tambe e structura y maneho di nos federacionnan. Un organisacion fuerte ta crea e base pa atletanan exitoso y un futuro deportivo sostenibel”, e mandatario a expresa. Segun Croes, e cooperacion cu organisacionnan internacional manera WBSC ta brinda oportunidad pa beneficia di experencia, conocemento y bon practicanan cu por contribui na profesionalisacion di nos federacionnan deportivo.
Mas capacitacion y intercambio di conocemento
Otro punto importante durante e reunion tabata ampliacion di oportunidadnan di capacitacion pa e comunidad deportivo Arubano. WBSC a expresa su disposicion pa sigui sostene e federacionnan local mediante intercambio di informacion, asistencia tecnico y organisacion di curso y programa di capacitacion.
E curso di Baseball5 cu a tuma luga durante e bishita ta un ehempel concreto di e posibilidadnan cu cooperacion internacional por brinda pa introduci y fortalece diferente modalidad deportivo.
Minister a destaca cu e oportunidadnan aki no ta beneficia solamente e federacionnan, sino tambe coachnan, dirigentenan, boluntarionan y atletanan cu diariamente ta contribui na desaroyo di baseball y softball na Aruba. “Capacitacion y intercambio di conocemento ta inversionnan importante den futuro di nos deporte. Ora nos fortalece e personanan cu ta dirigi, entrena y acompaña nos atletanan, nos ta crea mas oportunidad pa talento Arubano sigui desaroya y sobresali. Nos mester sigui inverti den hende, conocemento y organisacion”, minister a indica.
Cooperacion internacional pa un futuro deportivo mas fuerte
Durante e reunion, tur e partnernan envolvi a reafirma nan disposicion pa sigui traha hunto pa fortalece baseball y softball na Aruba. A dialoga tocante e importancia di un cooperacion mas estrecho entre WBSC, COA, ABBA, ASB y Ministerio di Deporte, cu e meta comun di identifica necesidadnan, mehora e structura organisatorio y crea un ambiente deportivo mas fuerte.
WBSC a expresa su aprecio pa e involucramento di Comite Olimpico Arubano y Ministerio di Deporte, reconociendo e importancia di un acercamento conhunto pa logra mehoracion duradero den ambos disciplina.
E mandatario a indica cu e encuentro ta representa un paso positivo den e proceso pa sigui fortalece relacionnan internacional y crea mas posibilidad pa desaroyo deportivo na Aruba.
“Nos vision ta pa construi un sector deportivo caminda nos federacionnan tin e instrumentonan, conocemento y sosten necesario pa funciona na un nivel profesional y responsabel. Cooperacion internacional ta un parti importante di e proceso aki, pero e berdadero progreso ta nace ora tur partner local ta uni forsa cu un meta comun”, minister a enfatisa.
Compromiso comparti cu deporte Arubano
Minister Croes a expresa su gradicimento na e delegacion di WBSC pa nan bishita, disposicion y compromiso pa sostene e desaroyo di baseball y softball na Aruba. Un gradicimento special a bay na Comite Olimpico Arubano, pa e coordinacion y cooperacion cu a haci e bishita posibel, y na ABBA y ASB pa nan participacion y compromiso continuo cu e deportenan.
E minister a reafirma cu su Ministerio lo sigui sostene e dialogo y cooperacion cu e diferente organisacionnan deportivo pa contribui na un sector deportivo mas organisa, inclusivo y prepara pa e desafionan di futuro.
“Baseball y softball ta forma parti di nos identidad deportivo y a brinda Aruba hopi momento di orguyo. Nos responsabilidad ta pa sigui crea e condicionnan pa e siguiente generacion di atletanan por sigui desaroya nan talento y representa nos isla dignamente. Bon maneho, capacitacion y cooperacion ta e fundeshi pa un futuro deportivo mas fuerte. Hunto nos por transforma e potencial di nos deporte den oportunidadnan concreto pa nos atletanan y pa Aruba”, el a conclui.
