E siman aki na Isla del Encanto, Puerto Rico, ta tuma luga e Florida Caribbean Cruise Association (FCCA) den e centro di convencion. Desde dialuna cantidad di ehecutivo den mundo di crucero a topa otro. E ta momento importante unda e partnernan ta topa cu otro. Aruba tambe ta ricibi varios turista via barco crucero, y p’esey Aruba Ports Authority (APA) y Aruba Tourism Authority (ATA) ta presente n’e FCCA.
APA y ATA ta trahando hunto pa mantene e relacionnan cu diferente linea crucero. Tambe pa ta mantene na e ultimo tendencianan den e mundo aki. E team di Aruba a tene diferente reunion cu e lineanan crucero, pero tambe cu otro stakeholder, cu asina ta crea e circulo industria di crucero.
Tabata tin un panel, cual un di e topiconan tabata crucero di luho. Un di e ehecutivo di crucero di luho a splica riba kico nan clientenan ta spera na momento cu nan yega n’un destinacion. El a menciona cu e area di Caribe ta bon, pero por ta miho, di tin iterinario cu henter dia tin conocemento di luho y nan ta spera cu e destinonan por mehora esey.
Esey lo haci cu crucero di luho lo ta atrai pa bishita e islanan di Caribe, naturalmente Aruba tambe.
Loke ta bunita ta, cu e aña aki APA ta celebra su di 45 aniversario. P’esey nan tabatin regalo conmemorativo pa diferente partner cu nan a topa. Diferente persona a ricibi e regalo, y nan tabata encanta cu ne. E regalo aki lo haya un bunita luga den nan oficina.
Despues a tuma luga di e apertura oficial di e trade show. Tambe tin e parti reunionnan, ‘one on one’, panel, presentacion. Pa loke ta e trade show, e destinonan tin booth. Algun di nan tabata Puerto Rico, Dominica y otro islanan Caribense. Aruba no tabata presente na esaki, pasobra den e ultimo añanan a pone mas atencion riba e reunionnan ‘one on one’ cu e diferente lineanan crucero.
Esaki a resulta den un forma exitoso na luga di para cu un booth n’e conferencia di Puerto Rico.
Pa loke ta trata e apertura, esaki a tuma luga pa 6:00 pm unda cu e gobernador di Puerto Rico tabata tin e honor pa corta e cinta. Esey oficialmente a duna apertura n’e trade show y diferente persona por pasa.
Den nos proximo reportahe di FCCA, nos lo ta combersando cu e representantenan di Aruba y asina ey por haya sa mas con a bay cu e reunionnan. Tambe pa haya resultado di e reunionnan. Asina ta keda pendiente pa mas di e cobertura di e FCCA Conference na Puerto Rico, unda por haya sa mas riba e tendencia di mundo crucero.
