Secretario General di sindicato SEPPA, Magaly Brito, a lanta bos duro contra e discusionnan actual rond di e salario minimo y e asina yama bestaansminimum. Den su declaracionnan, Brito a califica e debate aki como un “hipocresia di marca mayor” cu ta ignora e realidad precario cu e trahadonan di Aruba ta biba tur dia.
Un realidad di sobrevivencia pa e trahado
Segun Brito, e discusion constante pa drenta den e diferencia entre loke ta “minimo” y loke ta “necesario” ta duna un cuadro falso di e bienestar na Aruba. Un cantidad considerabel di trahado ta depende di e salario minimo, loke ta obliga nan pa dia a di bay scoge entre paga debe, cumpra cuminda, of cubri gastonan di remedi. Ora e gastonan aki no por ser cubri, e trahado ta keda sin otro opcion cu sacrifica su propio salu y bienestar pa por sobrevivi.
E impacto riba famia y salu mental
E lider sindical a duna di conoce cu e problema di salario minimo no ta keda limita na un simpel cifra economico of e entrada cu e trahado ta carga na cas tur luna. E ta un problema social profundo cu ta penetra den e hogarnan Arubano. Presion financiero ta causando un aumento alarmante den problemanan di salu mental den nos comunidad, como cu hopi famia no ta mira un salida cla pa por keda biba dignamente na Aruba.
Costo di biba y inflacion contra poder di compra
Brito a apunta cu biba na Aruba ta birando cada dia mas costoso pa motibo di un inflacion cu ta sigui subiendo, maske e cifranan oficial cu ta sali afo por ta mustra otro. Pa e trahadonan, sea den sector publico of priva, e aumento di e costo di biba ta exigiendo un coreccion constante. Sinembargo, pa hopi trahado, e aumentonan ta yega solamente como un “cachi-cachi” cu no ta duna suficiente alivio pa e retonan diario.
Coreccion di abuso di añanan
Un punto clave cu Brito a destaca ta cu e asina yama aumentonan den e salario minimo no mester wordo mira como un aumento real, sino como un coreccion di un abuso di añanan. El a trece dilanti cu tin trahado cu ta labora 40, 44, 45 te hasta 48 ora pa siman pa un salario basico, y cu e situacionnan aki tabata merece di wordo corigi urgente pa medio di un mehoracion rasonabel den e minimumloon.
Cu e declaracionnan aki, SEPPA ta bolbe pone e dede riba e herida, urgiendo atenvion inmediato riba e condicionnan di bida di e clase trahado na Aruba.
