Cu un maleta yen di soño y un paspoort marca cu e prome “Bonbini”, Jhon Freddy Tobón Montoya a yega Aruba trinta aña pasa sin sa cu e isla aki lo a bira su hogar eterno. Awe, e ta mira atras cu gratitud pa reflexiona riba un tres decada di perseverancia, amor y contribucion na e comunidad cu a dun’e e tera pa prospera.
Dia 23 di october 2026 ta marca un momento historico y hopi significante den bida di Jhon Freddy Tobón Montoya: exactamente trinta aña pasa, riba 23 di october 1996, el a yega nos isla, iniciando un trayectorio cu a transforma su existencia pa semper. Pa medio di un carta carga cu hopi emocion, humildad y amor, Tobón Montoya ta expresa su mas profundo gratitud na e pueblo di Aruba y na tur esnan cu a brind’e sosten, luz y cariño durante e tres decada aki.
Den su testimonio, Tobón Montoya ta reflexiona riba su caminda di bida, expresando cu Colombia a planta den dje e simia di su existencia, mientras cu Aruba a dun’e e tera fertil pa crece, prospera y duna fruta. El a sali for di su patria trinta aña pasa cu un maleta yen di soño y hopi incertidumbre, enfrentando retonan y sacrificionan grandi cu pocopoco a forma parti di su historia. E stempel den su paspoort y e prome saludo di “Bonbini na Aruba” a bira e cuminsamento di un capitulo nobo cu a laga un hueya eterno den su alma.
Tobón Montoya ta subraya cu amor no ta dividi, sino cu e ta multiplica ora tin aprecio y respet. E ta reconoce Colombia como su raiz, e luga unda el a ricibi su educacion, su esencia y su identidad, mientras cu e ta defini Aruba como su curason, e luga cu a habri brasa p’e, dunand’e libertad, proteccion y oportunidadnan pa desaroya su talento y su arte. El a sa di adapta su mes na e fortalesa di e tera aki, superando cualkier tormenta cu e mesun resistencia y humildad cu e naturalesa di e isla ta siña.
Haciendo un balans di e trinta añanan aki di perseverancia, caymento y lantamento, Tobón Montoya ta gradici Dios pa ta su guia, Colombia pa su raiznan, y Aruba pa su hendenan generoso, su solo, su baranca y su lama. Si el a por a papia cu e hoben cu a yega na 1996, lo el a conseh’e pa nunca perde fe den su mes y sigui cana firme, pasobra bida lo a mustr’e cuanto bendicion tabata sper’e. Awe, declarando su mes Colombiano di raiz y Arubiano di curason, el a reafirma su compromiso pa sigui sirbi, crea y duna lo miho di su mes, recordando cu e stempel di amor cu Aruba a laga den su alma no tin fecha di vencemento.
