Gobierno Hulandes kier prohibi uzo di smartphone na scol, tanto durante les como den ora di pauze. E medida ta forma parti di un plan pa brinda mucha miho proteccion den mundo digital. Secretario di Estado pa Enseñansa y Emancipacion, Willemijn Aerdts, a anuncia dialuna cu e prohibicion mester proteha muchanan contra distraccion den un ambiente caminda nan mester concentra.
Aerdts ta spera di introduci e medida, cu ta carga e lema “Na cas of den kluis”, entrante 1 di januari 2027. Segun e mandatario, hopi scol ya ta aplica e regla aki cu bon resultado. E reglanan mas estricto mester duna e scolnan cu ainda no a adopta e medida e empuhe necesario pa haci esaki tambe. Actualmente, Aerdts ta haci palabracionnan cu sector di enseñansa tocante e implementacion.
E prohibicion di telefon na scol ta forma parti di un pakete mas amplio cu Gobierno Hulandes ta prepara pa proteha mucha den mundo online.
“Pa medio di e strategia tocante derechonan di mucha online, Gobierno ta trahando pa crea un mundo digital sigur y saludabel pa tur mucha,” Aerdts a declara.
E pakete tambe ta inclui un proposicion conhunto di Gobierno Hulandes y Gobierno Spaño pa introduci un edad minimo Europeo pa acceso na plataforma di media social, cu menos excepcion posibel.
Ambos gobierno tambe kier pone responsabilidad cerca companianan tecnologico. Prome cu mucha haya acceso, e companianan lo mester demostra cu nan plataforma ta sigur y ta cumpli cu tur regla aplicabel.
Aerdts a bisa cu Gobierno Hulandes ta scoge cu satisfaccion e proposicion nobo di Union Europeo, conoci como EU Kids Act. Den e proposicion aki, Comision Europeo ta sugeri un edad minimo y exigencianan estricto pa diseño digital di plataforma y aplicacion. Esaki ta inclui prohibicion di diseñonan cu por crea adiccion.
Gobierno Hulandes ta evalua plataforma y aplicacion manera Netflix, YouTube, Roblox, Fortnite, ChatGPT, Instagram, Snapchat y TikTok pa determina si nan ta cumpli cu e reglanan mas estricto.
“Muchanan merece un ambiente sigur pa crece: un caminda nan por siña, busca informacion, conoce otro hende y hunga. Afo di internet, sea na cas of den cura di scol, nos ta considera esaki algo normal. Sinembargo, den mundo online, riba media social of den videogames, mucha por perde direccion rapidamente y enfrenta riesgonan inaceptabel,” Aerdts a bisa.
Como ehempel, el a menciona algoritmo cu por causa adiccion, contacto no desea y contenido cu por causa daño.
