E participacion di Aruba na e di 32 Conferencia di Asociacion di Barconan Crucero di Caribe (FCCA) a resulta den un exito rotundo, reafirmando cu e isla ta keda un marca (“strong brand”) sumamente fuerte y atractivo den e industria di crucero. Asina Marc Figaroa, CEO di Aruba Ports Authority (APA), a declara despues di reunionnan intensivo y fructifero cu lidernan y socionan di e sector.
Durante e cumbre, a resalta e cooperacion estrecho entre e delegacion di Aruba—compone pa representantenan di APA, Aruba Tourism Authority (ATA), tour operators y agentenan di haf —demostrando un front unifica pa fortalece y mehora e servicio y e experiencia cu e isla ta ofrece.
E aliansa di ABC y e importancia di Caribe
Un di e pilarnan principal di e representacion tabata e colaboracion entre e islanan: Corsou (a traves di CPA) y Bonaire. Como e aliansa “ABC”, e islanan a presenta nan mes como un bloke solido y atractivo pa e liñanan di crucero, specialmente pa atrae mas barco durante e temporada di menasa o “low season”.
Figaroa a enfatisa e posicion clave cu e region tin mundialmente: “Caribe ta representa mas o menos 45% di e industria di crucero na mundo. E ta un cifra bastante grandi cu ta demostra e importancia di nos region pa e mercado internacional,” el a señala, subrayando e impacto economico positivo y e necesidad di desaroyo sostenibel basa riba datonan concreto y real.
Focus riba Turismo di luho (“Luxury Cruise Lines”)
Un punto di discusion di gran relevancia tabata e crecemento sosteni di e segmento di crucero di luho. Aruba ta atrayendo e atencion di liñanan exclusivo manera Orient Express—parti di e prestigioso grupo Louis Vuitton—cu ta planea e yegada di su prome yate y barco di bela di altisimo nivel pa 2027.
Pa atende e demanda aki, cu ta bin cu expectativanan hopi halto y un capacidad di gasto superior, Figaroa a haci un yamada na henter e comunidad y e sector turistico local pa eleva e nivel di servicio.
“E demanda pa Aruba den e liñanan aki ta grandi. Nos tin cu prepara nos mes cu productonan ‘custom-made’ y eleva e nivel di servicio na e standard di mas halto posibel. E no ta un esfuerso solamente di waf of di ATA, sino di e comunidad local completo pa nos por saca e maximo probecho di e bishitantenan aki,” Figaroa a conclui.
