Den cuadro di e Conferencia di FCCA, Giovanni Ragunath, representante di Armada Port Agency, a resalta e importancia crucial cu e industria di crucero tin pa Aruba, como tambe e rol fundamental cu e agencianan maritimo (Port Agents) ta hunga den e logistica tras di e operacion aki.
Ragunath, kende tin mas di 25 aña di experiencia den e sector y 5 aña liderando Armada Port Agency, a enfatisa cu e participacion den e conferencia aki ta sumamente valioso pa keda al dia cu e cambionan y demandanan di e mercado internacional.
Segun Ragunath, e exito di Aruba como destinacion di crucero no ta depende solamente di e esfuersonan di gobierno of di e presupuesto di mercadeo, sino di un colaboracion estrecho entre e sector publico y e sector priva. “Nos tin cu traha hunto cu e gremio priva pa nos por bin cu un front uni y desaroya un destinacion cu ta atractivo tanto pa e liñanan di crucero como pa e pasaheronan,” el a declara. El a splica cu e barconan di crucero ta birando mas grandi, transportando mas pasahero y generando mas oportunidad, pero na mes momento esaki ta trece mas peticion y mas demanda logistico pa e isla.
Kico un ‘Port Agent’ ta haci
Splicando e rol di Armada Port Agency, Ragunath a compara un barco di crucero cu un “hotel flotante” (moving hotel) cu miles di persona, motor y trahadonan, unda semper tin situacionnan cu mester di solucion inmediato. Como Port Agents, Armada ta actua como un extension di e liñanan di crucero den e destinacion.
Actuando for di awo riba e itinerarionan y reservacionnan di barconan pa e temporadanan di 2029 y 2030 en coordinacion cu Aruba Ports Authority (APA). Logistica na tera ta encera cu ta coordina tur e servicionan esencial ora e barco drenta waf, manera suministro di awa, marooning, si mester di trapi na e terminal, transportacion di taxi, y asistencia medico o tecnico pa e capitan y e tripulacion.
E barco di crucero ta manera un “Taster” pa turismo, si nan ta interesa pa bolbe despues pa keda riba e isla mes. Tratando e tema di e impacto economico y si e fluho di turistanan ta un “overkill”, Ragunath a aclaria cu e crucero ta sirbi como un “proef/taster” di e destinacion. E barconan di crucero moderno ta transporta mas di 6 miyon di pasahero pa aña, y e bishita cortico na Aruba ta duna e turistanan aki un proef di e cultura, di su hendenan, naturaleza y comercio di e isla. “Maske no tur e 6.000 pasaheronan riba un barco ta gasta miles di dollar na tera — algun ta gasta hopi, algun tiki, y otronan simplemente ta cana rond gosando di e naturaleza — y e bishita aki ta motiva nan pa bolbe Aruba como turistanan di estadia largo (stayover),” Ragunath a splica.
Finalmente, el a elogia e iniciativanan local, manera e guianan di turismo cu ta duna walking tours den centro di ciudad (Downtown Oranjestad), mustrando e historia y e parlamento, cual ta eleva e experiencia di e bishitante y ta garantisa cu nan ta bay bek cu e impresion pa bisa: “Nos ta bolbe Aruba!”
