AVP no ta comparti e declaracion of splicacion cu ir. Edwin Jacobs, director di AZV, a duna recientemente. AZV no a keda lanta cu intencion di ta un fondo, kiermen bo no ta crea un surplus pa crea fondo. AZV su intencion ta pa ta un seguro medico di cual e primanan di tur aña ta cubri e pakete cu kier pa nos pueblo, un pakete completo unda tur hende ta haya su remedinan, ora bay cu pashent Colombia haya fondo necesario.
“No ta ningun placer ora bo ta bibando den e angustia ey como pashent na Colombia y esunnan cu a bay cu bo ta corta di e forma manera a haci. Ta momento pa realisa cu AZV ta introduci pa ta un pakete completo, no un fondo cu bo ta spaar manera sr. Jacobs lo a bisa cu ta pone reserva pa mañan ora cos bira mas dificil.” Esaki e lider di AVP Mike Eman a bisa den nomber di e partido.
AZV NO TA UN FONDO!
E politico a splica cu ora e situacion ta malo, anto e paso pa tuma ta bay mesa y delibera cu stakeholdernan si mester ahusta e prima un poco. Pero loke cu no por haci ta torno n’e aspecto basico cu ta cuido medico general pa comunidad. Ora AVP a drenta gobernacion, durante cierto periodo AZV su entrada no tabata suficiente, pa cual a dicidi di haci ahustacion n’e prima. “Nos no a corta un remedi of kita un dokter, no a corta salario di specialista. Nos a informa pueblo cu pa tur hende keda haya remedi y pa tur dokter haya pago, pa no bandona Aruba, nos mester haci ahuste di prima. Pero cu AZV a bira fondo cu awor ta capitalisa cu surplus, ta absolutamente incorecto y no ta cuadra cu e meta di AZV pasobra AZV no ta un fondo, e lider berde a subraya.
AZV ta seguro medico unda prima mester cubri gasto y ora esaki no ta e caso, sea gobierno ta subi landsbijdrage of ta ahusta prima pero no ta asina cu ta bay corta den esencia di AZV: cu ta cuido medico general pa henter comunidad.
POR AUMENTA PENSION PA TA DURADERO
El a mustra riba e 500 miyon extra di entrada cu Gabinete Wever Croes tin compara cu nan gobierno. “Nos a bisa cu e aumento di pension cu 50% lo mester bini por medio di espacio cu tin den e fondo mes, esey ta algo cu bo tin cu midi cuanto hende ta paga prima, cuanto placa ta drentando, cuanto espacio bo tin pa aumenta. parti grandi di e aumento di 50% lo no bin for di fondo pero di toeslag cu gobierno ta pone acerca pa por yega e 50%.”
Otro aspecto di e politico su pensamento ta cu si pone e bon comun na prome luga, cu prioridadnan corecto, sin ‘friends & family’, lo por logra. Y el a duna e ehempel con e gobernacion berde sin e 500 miyon florin adicional na entrada, a duna un reparatietoeslag na 22 mil persona. Esaki tabata e grupo cu no ta traha pa gobierno, pero e fondo a bini for di caha di gobierno pa por a suplementa e poder di compra cu a keda na werki despues di 8 aña di gobernacion di MEP.
E no ta compronde con cu e suma di 500 miyon florin menos a haci asina hopi, y awo cu e suma adicional no por a ni aumenta e pension di e grandinan cu 50%. “Ami ta convenci cu e ta posibel,” e lider di AVP a bisa.
E ta keda enfatisa cu mester busca un solucion pasobra no por pone 22 mil hende biba cu 1200 florin short tur luna. Un trahado hoben lo por sali di e situacion, pero no un pensionado kende fisicamente no por traha hopi mas. “pa un persona asina biba cu 1200 florin pa luna ta imposibel.
