Gobierno a firma aña pasa un acuerdo cu Jacksonville Port Authority di Jacksonville. Durante e bishita di Minister di Turismo na Merca, a tene combersacion cu nan como tambe e linea crucero Norwegian. A informa Boneiro riba e echo cu Aruba kier traha hunto, pero cu Corsou tambe, pa un iterinario nobo pa barco crucero sali desde Jacksonville. Tambe a papia riba e parti di haci exportacion desde e waf di Jacksonville.
Minister di Turismo, Dangui Oduber, a indica aña pasa a firma un MoU cu Jacksonville Port Authority di Jacksonville. Desde cu a firma e MoU, segun e mandatario, nan a sigui discuti riba varios punto concreto di accion y a follow up riba esakinan. Un di e temanan cu a papia durante e conferencia di Global Sea Trade, unda cu tabata e oportunidad cu e waf di Jacksonville a brinda pa tin un iterinario cu ta sali for di eynan pa Aruba cu e linea di crucero Norwegian.
E discusionnan a sigui n’e conferencia cu e linea di crucero Norwegian. E linea crucero a expresa, segun e mandatario, e interes pa tin un iterinario nobo. Algo cu no ta existi na Jacksonville, ya cu esaki ta un mercado completamente nobo cu ta explora. Tanto e waf di Jacksonville, Norwegian y Aruba a mustra interes, di cual a comparti esey cu Boneiro. Oduber a indica cu nan ta bay comparti esey cu Corsou pa mira si nan tambe ta interesa pa participa. A follow up riba esaki y ta mustra di brinda un oportunidad nobo.
Exporta desde Jacksonville
Un otro tema interesante cu e mandatario a atende cu ne tabata riba purba exporta desde Jacksonville. El a indica cu mayoria producto exporta di Merca ta sali desde Port Everglades na Miami. Casi 85% di exportacion ta sali desde e waf ey, cual ta un di mas grandi di mundo y e ta un waf competitivo.
A atende cu esaki den e MoU unda kier mira riba kico ta e oportunidadnan cu ta existi na luga di uza Port Everglades, uza esun di Jacksonville. Segun e mandatario, a papia cu varios linea cu tin ruta di Caribe manera Crowley cu ta pasa Puerto Rico for di Jacksonville Port. E ta importante pa netwerk y follow up.Keto bay nan ta mustra riba e interes pa sigui cu e discusionnan. Asina ey por mira si hunto por realisa, pasobra e ora ta bin competencia, ta bin cu marktwerking. Na final di dia e consumidor di Aruba lo beneficia di e prijsnan aki.
