Despues di ocho luna, finalmente a pone un fecha riba cual lo cuminsa interoga e testigonan pidi door di defensa di Otmar Oduber den caso Flamingo. Esaki e politico a anuncia dilanti corte dialuna mainta. Mesun momento el a bisa cu e ta haci un apelacion pa transmiti en bibo e caso Flamingo ora cu esaki bini dilanti.
Durante e conferencia di prensa e politico a recorda e cantidad di e aña aki tin andando, mas cu 4, y cu te ainda no a yega corte pa su tratamento.
El a bisa di ta lamenta e forma di actua di Ministerio Publico den caso Flamingo den cual a envolvi un cantidad di funcionarionan publico, sea riba contracto of den servicio, cu a resulta perhudica. Durante henter e investigacion a manda shete ambtenaar cas, pa aña, pero cobrando nan salario 100%. Y siendo cu no ta forma parti di e investigacion of no ta ni sospechoso. Tristo ta cu tin di e grupo aki, segun Oduber, cu a haya nan nombramento oficial of a haya promocion durante e periodo aki. A kita otronan cu tabata riba contract siendo cu a resulta cu no tin nada contra di nan den caso Flamingo. Nan no ta ni sospechoso.
“A simplemente core tras di hende den un fishing expedition, Ministerio Publico a drenta den tur departamento cu tabata cay bou di mi y no a sali nada.”
Determinante den e caso aki ta resulta di interogacion di testigonan clave den caso Flamingo. Den luna di juni lo bay scucha como testigo miembronan di RST (di Hulanda cu e ta bisa a traha rapport falso), y tambe miembronan di BCI, KPA y Landsrecherche. “No t’asina cu Ministerio Publico ta kere cu e por trapa riba ken cu ta …. Tin un cantidad di funcionario na cas, canando nan placa, pasobra nan gana nan caso. Na final e hendenan di Ministerio Publico ta coy nan maleta y bay Hulanda pa sigui nan bida normal. Mester bini consecuencia pa esnan cu ta actua di mala fe y actua malo. P’esey mi ta bay corte y pidi pa e tres instancianan aki forma parti di e interogacion.”
Oduber na final a bisa cu e ta pleita te na final cu e kier pa tur caso di Flamingo den corte wordo transmiti en bibo pa pueblo haya sa tur e cosnan malo cu Ministerio Publico a haci.
