Ora bo scucha nos himno, bo ta wordo inspira. Hende ta imigra bin Aruba pasobra segun mayoria, na Aruba tin hopi mas posibilidad y libertad compara cu nan propio pais. Pero awendia situacion na Aruba a para bira casi igual cu locual e imigrante lo por ta
experienciana su propio pais. E Aruba cu antes tur otro a admira, poco poco ta perdiendo su existencia.
Cada dia mas y mas pueblo ta testigo di un gobernacion sin transparecia. Ministernan cu no ta integro y cu no tin respet pa pueblo. Mayornan ta lanta y ta modela diariamente pa nan yiunan, pa nan yiunan por ta conciente di e importancia pa tin un estudio, e importancia pa sa kico ta norma y balor, y pa practica esaki. Pa ta un ser humano cu por yega leu den bida. Pero wak e show di nos Gobierno. Como mayor nos ta perdiendo tur nos credibilidad. Manera nos tur sa, un mucha ta siña mas di locual e ta mira, compara cu locual e ta djis scucha. E show aki lo sigui si nos como pueblo no hala un liña stret cu nos lidernan. Aruba y pueblo merece miho.
NO POR tin gobernacion sin ningun presupuesto. Aruba ta den crisis y cada florin ta conta. Con por ta cu gobernante nan ta tumando decisionnan costoso sin tin un presupuesto‘in place’ pa nos pais. Y ta parce tambe cu aña lo bolter y ainda Aruba lo no tin un presupuesto aproba. Pero show ta continua mientras pueblo ta sufri. A sigui tuma empleadonan den servicio y kier prolonga contractonan pa nan hendenan. Sindicatonan ta bay den accion pasobra gobierno NO kier termina e areglo di e 12.6%. Gobierno NO kier ta transparente cu pueblo y mustra pueblo unda e placa a bay y unda e placa lo bay awo cu e proyecto di fase a yega su final. Cifranan no ta cuadra, y pueblo su ‘calculator’ no ta sacando e mesun som cu gobierno ta duna.
Ta duna “Golden Handshake” na directornan di WEB pa nan bai y ta firma contracto cu Eagle LNG pa asina duna famia oportunidad pa trabou riba custia di pueblo. Gobierno sigur ta percura pa nan “Friends & Family” sigui biba bon. ‘Cuesta loke cuesta’. Ta scoge pa no sigui proceduranan manera stipula pa cu “Good Governance”, integridad pa stop conflict di interes y transparencia pero si pa sigura cu nan por keda haci y deshaci. Ta para cherche pueblo y sindicatonan cu yen dichonan inapropia. Ban keda profesional. Ta deber di gobierno pa cumpli cu pueblo. Acerca pueblo cu comprension y respet na tur momento.
E show aki no por sigui mas. Aruba ta di nos tur. Tur cos cu pasa riba e baranca aki, ta afecta nos tur. No ta asina cu por laga cierto famia y amistadnan bira ‘elite’ y dirigi Aruba na nan propio bienestar. E pelicula “Titanic” a mustra bon cla, con e grupo di ‘elite’ nan a sinta den nan “lifeboat” cu tabata tin amplio espacio, y wak otronan sink cu e barco.
Y ban ta honesto, ta hopi facil pa tuma decisionnan irresponsabel ora bo sa cu abo lo sali beneficia. Gobierno actual no tey pa pueblo, nan tey pa keda regla cuenta te cu nan logra tin Aruba completo den nan plant’i man. Pueblo no para wak, no para warda, nos tin cu percura pa Aruba y pueblo hunto sali bon.
