Camara di Comercio (KVK) a organisa su evento anual Aruba Business Chamber Event, cu a resulta un exito grandi. Kawish Misier, presidente di e entidad, a comenta na final cu e evento tabata hopi bon y a logra yena e sala di personanan di diferente sector cu hopi gana pa haya un experencia nobo. “Tabatin young entrepeneurs, profesional, studiante, hendenan cu tin pensa di habri nan negoshi. E luga tabata jam packed. No tabata tin luga mas pa sinta,” Presidente di Camara di Comercio a comenta.
E oradornan, sr. Frans Ponson y e orador internacional Carl Gould a haci un tremendo presentacion, unda cu a inspira y comparti tur nan conocemento, idea, con e publico presente por ta exitoso den nan mesun negoshi. Con nan tin cu tene cuenta cu chain/chain economy y con nan por ta exitoso.
Preguntanan cu a haya den e parti di Q&A tabata hopi bon. Cu e evento aki a pone Camara di Comercio riba mapa. Sector priva a sostene Camara di Comercio y nunca antes por a mira asina hopi empresario hunto bao di un solo dak. KVK ta hopi contento di e calidad halto. Hende di tur skina di Aruba, a sinti nan mes representa pa Camara di Comercio.
Durante aña ta haci hopi evento, pero esaki ta e miho evento cu Camara di Comercio a haci e aña aki pa cual ta gradici tur esnan cu tabata t’ey presente, e directiva, staff, como tambe nan sponsornan.
Representacion
Negoshinan cu ta inscribi na Camara di Comercio, kier conoce otro empresarionan. P’esey nan tabata presente na e evento di Camara di Comercio. E no ta solamente e parti di presentacion cual ta educativo, pero tabatin entretenimento. E 300 top entrepeneurnan di Aruba tabata den un otro sala ta network, one on one cu e oradornan y tambe cu e directiva.
Esnan cu no tabata t’ey presente, no por faya e siguiente edicion di e evento annual aki, durante cual e participante ta siña mehora su mes, “bo t’ey pa mehora bo negoshi” Bo ta cera acuerdonan cu otro empresario, pa asina Aruba bay mas dilanti. Ta mehora nos economia y ta bira mas resiliente den un “changing economy”, cu tambe por ta un “challenging economy”.”
Oradornan
Misier a comenta cu e orador local tabata Frans Ponson. Na diferente ocasion, organisacionnan a puntr;e pa e comparti su idea y su experiencia. Pero casi semper el a bisa no. El a mira e rumbo cu KvK ta bayendo di haci un bon trabao di representa sector priva. Tambe a acerk’e, pasobra semper kier entrepeneurnan local y scucha di nan experiencia con nan ta haya kico ta pasando na Aruba, kico mester haci na Aruba pa ta exitoso. KvK tabata hopi contento ora cu Ponson a bisa si.
A acerca Mark Gould cu e peticion pa bin Aruba y haci su presentacion, cual el a acepta cu mil amor. Den tur e añanan cu Misier ta bin tipo di eventonan asina, tur dos cabayero a haci un tremendo trabao di inspira y educa e publico presente.
Miembronan satisfecho
Misier a comenta cu e feedback cu ta haya di comerciantenan ta cu nan ta hopi contento cu Camara di Comercio t’asina activo. “Nos ta representa sector priva y e portanan di Camara di Comercio ta hancho habri y ta ricibi tur comerciante, stakeholders, gremionan pa nan por duna nan pregunta, sugerencia y preocupacion. Sector priva por conta riba un Camara di Comercio solido pa nan por respresenta nan y haci su trabao manera mester ta.”
