Durante di un conferencia di prensa yama pa Comerciantenan Uni, varios di nan, entre otro Francis Saladin a hiba palabra y a expresa su preocupacion como tambe a refuta e poniencianan di minister di finansas, Xiomara Ruiz-Maduro.
El a menciona cu basicamente ora cu a cuminsa cu e debate cu minister Xiomara Ruiz-Maduro, e preocupacion tabata cu e parti di sconde e BBO den e prijs, cu lo duna e refleho cu comerciantenan ta subiendo prijs, mientras cu e realidad ta cu e prijs no a subi. Ta simplemente e hecho e BBO ta inclui den dje. Esey ta crea confusion. Riba dje, na e momento ey, ta crea mas confusion na momento cu e minister a sali bisa, cu comerciante ta bay pag’e y no e consumidor. Esaki ta algo cu a crea masha confusion mes den pueblo, na unda cu pueblo a kere cu comerciantenan no ta suppose di cobra BBO na e consumidor y el a duna e impresion cu tur e añanan aki a cobra BBO pa gobierno y en realidad nan mester a page di nan saco, cual no ta berdad, segun Saladin.
Aki ta mustra pueblo cu esaki no ta cla y esaki no ta berdad. Ta haya lamentabel cu minister di finansas a bisa esaki y a crea e confusion. Saladin a menciona cu ta masha facil pa di un manera of otro prueba esaki cu e recibi di SETAR. Riba e recibo di SETAR ta mira cu ta cobra pa mobil hybrid 99 florin. Separa di dje, ta wak cu ta cobra BBO y BAVP. Y ta mira cu e total ta bay pa 104 y 94 cen. E suma final cu ta paga no ta 99 florin pero 104. Pues por mira cu ta e consumidor ta paga pa e BBO, BAZV y BAVP. “Esaki ta mustra bon cla, cu ta consumidor ta paga p’e y e ta un compania di gobierno. Esaki no ta Frasa of cualkier otro empresa. Esaki ta refuta e parti caminda cu e minister di finansas cu ta comercio mester pag’e. Si comerciante mester pag’e, e prijs aki mester ta 99 florin y no 104 florin. Kier a clarifica esaki pasobra esaki ta e parti cu tabata tin miedo di dje, cu e ta crea confusion, na momento cu ta inclui e BBO den e prijs.”
No obstante por a mira cu SETAR a cumpli y a hinca e impuestonan, y awo el a bira 105. Ken ta pagando BBO, BAZV y BAVP. Diferencia ta, cu no ta mira esey. A papia cu e BAVP ta algo temporal. Pero e realidad ta cu abo como consumidor, cu bo ta bay paga pe y bo no ta mira mas cuanto bo ta paga na belasting.
Despues di esaki, nan por subi e prijs cuanto cu nan kier y e belasting bo no sa mes mas cuanto el a subi of si e no a subi. Of si ta e comerciante ta subiendo su prijs of no. Esey ta e motibo pakico kier a mantene e BBO separa for di e recibo. Ora haci cambio den belasting, ta facil pa cambia e porcentahe. Bo por subi’e, bo por bah’e, pero e prijs ta keda mesun cos. Awo ta mira un prijs cu ta bay di 99 florin pa 105. Despues e por bira 110 y bo no sa mas cuanto e belasting ta.
Saladin a sigui splica cu e minister a bisa cu full e debate a cuminsa cu tin comerciante ta cobra 6%, y otronan ta cobra 6.8%, El a sali splica cu entrante 1 di october, con ta calcula e BBO. Si mester lesa e splicacion di e minister, e realidad ta, cu si e comerciante bende un producto 100 florin riba shelf, e ora e comerciante ta cobra 6% di BBO, ta pagando e 6 florin so di BBO. E minister mes ta duna e comerciantenan rason, di cobranan 6.38% pa yega bek na e prijs di 100 florin. Tanto discusion cu tabata tin riba e tema aki, crea un confusion.
A bira ora pa duna sosten y no pone mas medida, segun Saladin.
