Den un comunicado, Obispado di Willemstad ta informa cu a cancela e decreto tuma pa Aruba. Esaki a bini despues di a combersa cu gobierno di Aruba.
E carta cu el a manda awo ta bisa lo siguiente: Na prome luga mi ta gradici gobierno di Aruba pa medio di prome minister Sra. Evelyn Croes pa e bon dialogo entre gobierno y Obispado di Willemstad. Alabes mi ta felicita gobierno di Aruba pa e bon trabou cu nan ta haci pa yuda den e meta comun cu nos tin esta di tene nos comunidad mas safe cu ta posibel.
Despues di a emiti e decreto cu a drenta na vigor 26 di maart 2021 mi ta emiti e siguiente decreto.
1.Despues di a ricibi carta di prome minister di Aruba Sra. Evelyn Croes cu e situacion di Covid 19 no ta exigi mas un escalacion di medida na nivel di Corsou y Bonaire manera a premira.
2.Despues di tuma nota di e medidanan cu si ta drenta na vigor pa cu isla di Aruba.
Suscrito Mgr. Luis A Secco Obispo di Willemstad ta cancela e decreto emiti for oficina di Obispado cu a drenta na vigor 26 maart 2021. E cancelacion aki ta drenta den efecto mesora cu su publicacion. Tur orario di misa y actividadnan religioso tin cu keda adapta na e orario di Toque de Queda manera stipula den e medidanan di gobierno di Aruba.
Laga nos keda den oracion y cumpli cu tur e medidanan den nos misanan y tambe den pais Aruba pa hunto nos salba bida di hende y keda salud.
Loading…
Reload document 
Open in new tab 
