Durante e conferencia di prensa di gobierno riba e medidanan nobo cu a bin cu ne, Sharline Koolman di DVG a indica cu Crisis Team a dicidi cu ta miho pa frena e cantidad di persona cu ta frecuenta riba caminda.
Ta pa e motibo aki mes a dicidi pa cera tur scol entrante dialuna pa dos siman, mirando cu lo bay tin vakantie e siguiente siman toch cu ta duna un tiki mas trankilidad.
Aki menos hende ta frecuenta otro y esey lo yuda pa bin cu un miho control.
Tin excepcion, segun Koolman. Esaki ta conta pa hobennan cu ta den examenklas. Docentenan por bin na acuerdo cu e alumnonan directamente pa mira kico lo ta mas miho.
Pa loke ta gym y localidadnan pa haci ehercicio, esakinan no por ta habri durante e siguiente dos simannan. Crisis Team y Salubridad Publico ta stimula hende pa train, cual ta nan meta, pero ta stimula pa hacie mas tanto pafo y no den gruponan grandi, mirando cu tin un samenscholingsverbod.
Crèchenan si ta keda habri pa esunnan mas chikito por asisti.
Mirando cu ta bay tin vakantie di scol, normalmente sa tin camping pa muchanan por asisti. Esaki tampoco no ta permiti. Tambe actividadnan di drive by of drive thru tampoco no ta permiti.
Restaurantnan por duna servicio na maximo 4 persona parti paden y 4 persona pafo, no ta importa si ta famia of amistad. Muchanan bao di 12 aña no ta conta na e cantidad di 4 persona na un mesa.
Loke si ta permiti, pero cu cautela, ta pa atende un familiar manera un hende grandi, cu tin mester di ayudo medico, social/emocional, etc. Por ehempel hiba cuminda, remedi of pa duna e persona un tiki sosten, pa por pasa door di e temporada aki. Sinembargo ta bon pa minimalisa e contacto directo cu e persona. Uza tapaboca na tur momento y aplica tur medida di higiena.
Entretenimento musical ta keda manteni na un persona y cu musica abao pa evita cu clientenan por papia duro of grita.
Pa loke ta entiero, esaki por tuma luga te na un maximo di 10 persona.
Ta pidi trahadonan den oficina, durante ora di oficina ta tene na regla. Ora nan ta bay lunch hunto, e por conta como un contacto. P’esey ora pidi informacion di contact tracing, no mester sconde.
Tur hende ta trahando duro y ta pidi cooperacion pa no solamente alivia, pero yuda baha e cantidad di casonan mirando cu esey ta un peso pisa riba e grupo cu ta haciendo di nan parti y colabora pa hende haya servicio mas lihe posibel. Limita contacto pa baha e cantidad di contagio.
