Diabierna mainta Corte a dicta sentencia den e caso contra Andrick Royer di 23 aña, acusa di a tene relacion sexual cu un mucha muhe menor di 16 aña.
Durante e tratamento fiscal a pidi pa declar’e culpabel.
Hues a haya proba cu el a tene relacion sexual cu e menor, esta un mucha di 14 aña. Aunke cu e ta bisa cu e no tabata sa cu ta un menor, Hues no a kere su palabranan.
A bis’e cu den un declaracion e mes a declara cu e mucha muhe a bis’e cu e tin 16 aña pero cu el a pensa cu e tin menos cu esey. “Bo mester a averigua, Hues a bis’e. Bo mes no a kere cu e tin 16 aña,” a bis’e durante lesamento di e sentencia.
Hues a tene cuenta cu e mucha muhe a sali na estado, cu lo afecta su resto di bida, ta afecta su posibilidadnan di sigui studia. Pero a tene cuenta tambe cu e acusado a siña su les y a bisa cu e kier percura pa e yiu.
E castigo cu e mester sinta ta apenas 9 luna. A dun’e dos aña (24 luna), pero 15 luna ta condicional, cu un tempo di prueba di 2 aña y guia di Reclassering.
