Mescos cu e Spirito di Dios t’ey aki riba mundo, pa hiba hende den e caminda di Dios pa bida eterna, e diabel tambe t’ey pa hiba hende den perdicion y morto eterno.
Pasobra aki riba tera ora un persona faya cu ley (husticia) e tin cu carga e consecuencia di su fayo cu husticia, cual hopi biaha por yega te na castigo di prison.
Ora un hende ta aparece dilanti di hues pa mesun cos cada rato, su castigo lo aumenta, pasobra e ta demostra, cu e no a siña su les y cu e no ta respeta ley.
Awo e palabra di Dios ta siña nos den Romanonan 3:23 bisando: “Pasobra tur a peca y falta e gloria di Dios.”
Esey ta nifica cu pica, no ta nifica algo pa competi cu ne, bisando ken ta haci pio, of ken ta mas malo, pero ta algo pa arepenti, aparta y biba pa Señor.
Pasobra ningun instancia terenal no tin e autoridad di manda hende fierno.
Solamente Dios por haci esey y ta p’esey hende no mester provoca Dios.
Pasobra hopi biaha hende ta biba den inmoralidad y impuresa cu proteccion di ley terenal y ta tuma tur esunnan cu ta hala nan atencion di nan bida di pica na malo y ta compara nan pica cu otro enbes di arepenti for di pica.
Mescos cu Dios a instala autoridad riba mundo, di cual ta para skirbi cu nos tur mester somete nos mes na autoridad existente, Dios a pone e Iglesia pa nos tur por biba segun e ordo di Dios.
Pasobra ora un hende no ta respeta Dios e ta resulta den fierno, (Galationan 5:19-21) si e no arepenti.
Dios a duna tur hende e oportunidad di salbacion y ricibi bida eterna ora nos kere den su yiu Cristo Hesus y esey ta e plan di salbacion. (Juan 3:16-21)
Palabra di Dios ta bisa cu si nos confesa nos picanan, Dios ta fiel y husto di pordona nos nos picanan y limpia nos tin tur inhusticia. (1 Juan 1:9).
Ora hende no ta respeta Dios y ta sigui provoca Dios, keriendo cu ta hende ta molestia, ora hende ta busca tur manera pa sigui den maldad, cambiando ley pa duna nan e oportunidad di sigui peca y haci bofon di Dios, ta para skirbi cu lo sosode lo siguiente:
Ma pa motibo di capricho y bo curason cu no ta arepenti bo ta montona furia di Dios pa bo mes, den e dia di furia y revelacion di e huicio husto di Dios. Kende lo paga cada ken segun su obranan. (Romanonan 2:5-6)
P’esey considera e miembronan di boso curpa terenal como morto pa inmoralidad, impuresa, pasion, deseo malo y golosidad, cual ta igual na idolatria, pasobra pa motibo di e cosnan aki furia di Dios lo baha riba e yiunan di desobedencia. (Colosensenan 3:5-6).
Pasobra si nos sigui peca boluntariamente despues di a ricibi conocemento di e berdad, no ta keda sacrificio pa pica mas. Sino un cierto expectativa di huicio y e furia di un candela cu lo caba cu e adversarionan. (Hebreonan 10:26).
Cada persona cu ta bay contra Dios y Su palabra y tur esunnan cu ta aproba y apoya nan desobedencia ta bira un adversario di Dios.
Ta keda na kada ken pa realisa cu bo rebeldia no ta cu hende, ni cu religion, ni cu iglesia, pasobra ta para skirbi ora hende no ta reconoce Dios, con Dios ta entrega nan na un mente perverso pa haci cos cu no ta cumbini. (Romanonan 1:28-32)
Sinceramente, Pastoor Marcel Balootje
