Durante conferencia semanal di partido AVP drs. Mervin Wyatt-Ras a trece padilanti cu diahuebs siman pasa a aproba den sala di Parlamento e ley cu ta regarda ortografia di papiamento.
E ley ta data di basta anja. Na anja 1992 e discucion encuanto di nos idioma y ortografia a inicia. Na anja 2003 Parlamento di Aruba a aproba e ley cu a haci papiamento nos idioma oficial banda di Hulandes. Despues na 2006-2007 Parlamento a dunan comentario ariba nos ortografia. Tabatin discucion entre profesional di con ta skirbi cierto palabranan. Tabatin diferente corientenan of formanan di pensa. Esaki a tuma su tempo pa yega na otro. Na maart di anja 2017 e ley a bolbe drenta Parlamento cu tur e cambionan cu Parlamento a haci. Aki por a nota cu e lista di palabranan a ser adapta segun comentarionan di Parlamento. Drs. Mervin Wyatt-Ras mes tambe e tempo ey a duna su comentarionan. Por a nota presencia di profesionalnan cu a traha ariba e ortografia den tribuna y ta masha contento cu esaki. Mientrastanto e ortografia cu a ser aproba ta caba a ser uza den diferente cursonan y dor di corectornan. Pesey mes a pone e seyo riba e ley cu ya ta ser uza ampliamente. Papiamento ta un mexcla di diferente idioma, loke ta haci mas facil pa sinja otro idioma. E ta pone bo sinti orguyoso ora bo papia bo idioma den exterior. E hecho cu nos ta aproba nos ortografia ta habri portanan pa nos traha hunto cu otro pais y pa eleva nos idioma.
Ora bo sinja otro bo indioma manera e palabra bondia y dushi yiu e ta pone bo sinti orguyoso ora bo tende personanan di otro pais papia bo idioma. Ora pasa e ley nos no ta cla ainda paso idioma ta den desaroyo den un proceso continuo. Nos pais ta uno hoben, igualmente ta nos idioma.
Wyatt-Ras ta spera cu mas hoben lo uni na e forza pa traha riba e ortografia pa sigui desaroya nos ortografia. E ta parti di nos identidad, nos cultura. Especialmente papiamento mester competi cu ingles cu ta ser hopi papia bao nos hubentud.
Wyatt-Ras ta sinti su mes hopi orguyoso di ta papia papiamento. E ta un idioma cu ta consisti di palabranan di diferente idioma, locual ta haci’e interesante y ta yuda cu ora nos mester sinja un otro idioma. Fraccion di AVP a entrega 2 amienda. Un di nan tabata pa evalua nos orografia despues di 10 anja cu no a ser aproba y e otro mocion cu a carga aprobacion unanime tabata pa cambia e intitule di e ley y pone na papiamento esta ordenanza nacional di ortografia di papiamento. E ley finalmente a ser aproba unanimamente. Wyatt—Ras ta felicita un y tur cu a traha riba e ley y cu lo sigui traha ariba dje.
