Fiesta di San Martin ta un fiesta tradicional Portugues cu ta ser celebra como e dia di biña nobo, esta dia di purba e biña Portugues. Un fiesta cu ta conoci y ta ser celebra den grandi na e districto di San Martin situa na costa sur oeste di e capital di Madeira cu ta Funchal.
E fiesta di San Martin ta un fiesta principalmente celebra na Portugal y
Madeira na luna di November. E fiesta aki ta presenta diferente tradicionnan Lusitana cu ta ser celebra cu baile Portugues, cumindanan tipico y sin laga afo e ‘tasting’ unda ta purba e smaak di e biña Portugues cu ta ser cosecha durante e aña.
E fiesta di San Martin ta asocia cu un bon ambiente di convivencia y di solidaridad reforsando e lasonan di amistad entre amigo y famianan. E Santo ‘patrono’ di e produccion di biña e dia aki ta San Martin. San Martin tabata un soldad Romano, cu riba un dia hopi friu el a encontra un ambulante riba caya cu tabatin hopi friu y tabata sinti malo y e ambulante a pid’e yudansa. Como un bon soldad Martin a kita su capa y a duna e ambulante pa protege di e friu. Di e momento ey diripiente e friu a bay y e ta cuminsa bira mas calor y enberdad t’asina ela sosode.
Celebracion Cultural Diasabra 10 di November 2018
Na Aruba tambe nos ta celebra e dia aki den grandi, e aña aki riba diasabra
10 di november 2018 na Fundacion Social Cultural Portugues miho conoci como ‘Club Primavera’ of ‘Club Portugues’.
Directiva actual ta preparando e fiesta tradicional aki cu masha entusiasmo y ta celebra e fiesta e aña aki un poco multi CULTURAL. Lo bay tin presentacion di
Grupo Folklorico di Peru TAKIRI PERU, Grupo Folklorico Cultural Dominicano na Aruba y Grupo Dabaruida Aruba y Grupo Folklorico Primavera y acompaña pa Banda Musical Primavera cu lo t’ey presente for di Venezuela Sra. Fatima da Silva Gomes cu su musica di accordion.
Cuminda y Bebidanan tradicional Portugues
Como parti di celebracion aki nos no por laga afo e cumindanan tipico, y tradicional Portugues lo bay tin oportunidad pa purba e plato principal Madeirense cu ta e ‘Espetada Portuguesa’, acompaña cu dushi pan ‘Bolo do Caco’, tambe ‘Bacalao a Portguesa’, sopi tipico Portugues esta ‘E caldo verde’. Y pasaboca dushi manera ‘Bolo de mel’ y ‘Broas’.
Cada pais tambe lo ta presente cu cosnan dushi pa vende.
Invitacion
Directiva ta extende un invitacion personal na henter e COMUNIDAD RESIDENCIA AKI NA ARUBA pa pasa diasabra awor 10 di november na ‘Club Primavera’ y celebra e gran dia di San Martin den forma MULTI CULTURAL cu lo cuminsa pa 7or di anochi cu e parti di purba cosnan dushi, y cuminda. Y e Show lo cuminsa pa 8or di anochi. MAS CU CLARO ENTRADA TA COMPLETAMENTE GRATIS ¡!!
