Den e ultimo 10 añanan aki mas cu 90.000 Cristian a muri pa nan fe den Señor y nos tur sa cu segun e tempo ta avansa hopi mas lo bini aserca, pasobra maldad ta avansa, y maldad kier cera boca di esnan cu ta para pa e berdad y nos ta bibando den e ultimo temponan ( Judas 1:20+21).
E lucha no ta contra carni y sanger, e bataya no ta carnal, e bataya no ta contra ningun persona, pero contra e spirito di engaño cu ta pasa rond mundo y cu ta lastra hende hiba fierno cu ne ( Efesionan 6:12).
Si bo mira un hende ta bay cay den un buraco cu e no por sali, y bo no bis’e anto bo no ta un bon prohimo, pasobra Hesus a bisa stima bo prohimo manera bo mes.
Hesus a bisa bon cla den Mateo capitulo 24 y capitulo 25 :1-13 kico lo bay sosode, y nos tur ta mira kico ta pasando rond mundo y tambe aki banda cerca nos, p’esey Señor ta exigi pa tur esnan cu ta menciona su nomber para pa su palabra.
Den e buki di Daniel capitulo 6 nos ta mira un homber den posicion di gobernador, cu tin un Spirito extraordinario,( Cual ta bini di Dios) y cu rey a dicidi di pone como hefe riba tur otro gobernador den e pais.
Nan a busca tur manera pa traha un trampa p’e , pa asina tumb’e for di su posicion, ma nan no a logra y nan a dicidi cu e unico forma cu por pone e homber aki tambalia ta ora bo yega na su Fe.
Pero aki nan tambe nan no a logra pasobra Daniel tabata sirbi su Dios constantemente, cu ni placa, ni posicion, ni tampoco amistad por a pone lubida su Dios.
Y locual a pasa cu Daniel siglonan pasa ta pasando awendia atrobe, caminda nos como yuinan di Dios tin cu para fuerte, firme y fiel, pasobra e diabel ta cana manera un leon rugiente buscando ken e por devora.
Nos mester para contra maldad, y inmoralidad, pasobra e enemigo ta busca tur manera pa infiltra tur caminda, cu su plan di destruccion.( Juan 10:10).
Dios a manda su unico Yiu pa ken cu kere den dje no bay perdi, ma haya bida eterna y toch hende ta scoge pa biba den scuridad.
Y segun scuridad ta avansa riba mundo, e ta keda notable e banda cu hende ta scoge en bes di busca Dios.
Un pregunta ta sali nos dilanti tur dia, con por ta posibel cu hende ta mira e bondad di Dios ma toch ta scoge e malisia di diabel? Y nos por haya e contesta den Juan 3:18 -20.
Daniel su punto fuerte ta oracion y su dedicacion na Dios, su fe a pone cu e no a wak e oposicion di 120 hende of mas cu ta contra dje, pero e a mantene su bista riba Dios cu ta cu ne.
Laga nos tene cuenta kico un homber cu Fe por haci contra 120 hende cu ta contra dje, pasobra ora nos para pa Dios y su palabra , Dios semper lo respalda nos.
Y no solamente esey, ora nos para pa Dios su palabra hasta nos enemigo lo reconoce cu e Dios cu nos ta sirbi ta e Dios berdadero (Daniel 6:26-27)
Awe mas cu nunca laga nos para firme, fuerte y fiel den Señor.
Sinceramente, Pastor Marcel Balootje.
