Un adicto cu a cuminsa bende droga pa financia su adiccion finalmente a hay’e dilanti mesa berde y declara culpabel pa benta di droga. Ta trata aki di Alexio Th. di 63 aña. Ministerio Publico a acusa e homber aki cu for di e periodo di 30 di april 2012 te cu 30 di april 2022, pues durante un decada, el a viola ley di droga, bendiendo e substancia ilegal aki. Na momento di su detencion, a confisca 1.6 gram di cocaina y 6 gram di marihuana riba dje.
Ta papia aki di un decada cu ta basta aña y e acusado mes ta nenga cu el a pasa asina hopi tempo ta bende droga. E ta corda cu un gran parti di e periodo menciona e tabata bende pisca na Brazil. Te cu 2019. Cu perdida di su ruman homber, kende a sufri un ataca, el a manera cay den otro den 2020 y a cuminsa uza droga. Pero door di problema financiero, a dicidi di bende loke nan ta yama piedra pa a cambio e haya droga pa su mes.
El a bisa cu cos no tabata bon p’e y el a pasa den diferente situacion fastioso. Asina na 2021 e tabata victima di atraco pero el a bira alcoholico tambe. Den Corte el a pidi disculpa na e habitantenan di Brazil cu tabata sufri molester di su actonan ora cu el a bay biba cerca un otro adicto. “Mi sa cu loke mi a haci no ta bon”, el a bisa hues. Na KIA el a cuminsa papia cu un psycholoog pasobra e kier stop cu uzo di droga pero tambe ta admiti cu e mester di ayudo riba e caminda pa su rehabilitacion. “Mi kier bay Centro Colorado.”
Hues a repasa e dossier di e acusado aki y a topa cu declaracion di un cliente di dje cu a bisa cu na 2012 caba el a cumpra piedra cerca dje. Nan no tabata cumpra cerca dje, el a bisa. Pero e tabata busca e piedra cerca su ruman y hib’e pa nan. Pues por bisa, e tabata bende pa su ruman. “Na 2020 mi a cuminsa bende droga, ora cu mi ruman homber a muri. Mi a sigui den 2021 y despues den 2022 te ora cu nan a detene mi.”
